کوئٹہ: بلوچستان حکومت نا محکمہ داخلہ نا کُنڈ آن شنگ مروک نوٹیفیکشن نا رِد ئٹ بلوچ وومن فورم(BWF) نا بُنجاہی آرگنائزر ڈاکٹر شلی بلوچ، و بلوچ یکجہتی کمیٹی نا باسک نازگل و سید بی بی ئے انسداد دہشتگردی ایکٹ 1997 نا سیکشن EE-11 نا رد ئٹ چھارمی شیڈول ٹی اوار کننگا و اوفتے پاننگانے کہ زو عدالت ئٹ پیش مریر۔
بلوچ وومن فورم دا گام ئے رائے نا درشانی و چرّینگ نا آجوئی آ پاش آن پاش رکھ خلنگ پارے کہ دا پر امن کاریم تے توننگ نا کوشست ئسے۔ بلوچ وومن فورم پارے کہ حکومت نا طاغت نا ناجائز کارمرز و مخالف آتا برخلاف کریک ڈاؤن مہالو علاقہ ئے غیر مستحکم کرینے۔
بیان ئٹی مستی پاننگانے کہ بلوچ وومن فورم ہر وخت جہی بندغ آتا بنیاتی بندغی حق آتا رکھ ئکِن سرگرم مسنے و سرگرم مرو۔ فورم حکومت آن خواست کرینے کہ دا نوٹیفیکشن ئے زوت ہلنگ مرے و دا فیصلہ ئے قانودی و سیاسی فورم آتا چیلنج کننگ مرے۔
بلوچ وومن فورم نا بُنجاہی ترجمان پارینے کی دون انگا گام آک بیرہ پر امن آ توار آتے توننگ کِن ءُ۔ ہرافتے نن ہر فورم آ ترندی ئٹ شیف خلون۔
