بلوچ یکجہتی کمیٹی ضلع خضدار نا علاقہ زہری ٹی برجاء لشکری پلویڑ و کاروائی تے شیف خلک۔
اسہ بیان ئسیٹی بلوچ یکجہتی کمیٹی پارینے کہ پاکستانی لشکر نا نیمہ غان فضائی بمب گواری، زوراکی نا بیگواہیک، و لس بلوچ شاری تے ٹِک کننگ نا حوال رسینگانے۔
بی وائی سی نا رد ئٹ پک مروک زمینی رپورٹ آتا رد ئٹ 5 اکتوبر آ پاکستانی لشکر زہری ٹی فضائی بمب گواری کرینے، ہرانا سوب آن پنچ بے گناہ شاری زالبول و چنا تیتون اوار شہید و مسٹ ٹپی مسنو۔
شہید کننگوک آتیٹ عبدالحکیم نا مار منظور احمد نا اِرا مار و اسہ ایلم نا مار ئس اوار ءِ۔ اسہ پیر او زالبول ئس بی بی رحیمہ و اونا مار ہم بمب گواری ٹی شہید مسنو۔
رحیمہ بی بی نا اسہ مار ئس و مسڑ ئس بھاز ٹپی حالیت ئٹ ہسپتال آ دننگانو۔
درشان ئٹ پاننگانے کہ زہری ٹی پاکستانی لشکر نا پلویڑ و مواصلاتی نظام نا بلیک آؤٹ نا سوب آن تدینی تا معلومداری تے اسہ ہفتہ ئسے آن پد مونا ہتنگانے۔ علاقہ ٹی بندغی حالیت آک ترندی ئٹ خراب مننگ ءُ و ہندی آبادی بھاز مشکل تیتو مون تننگ ءِ۔
بی وائی سی پارینے کہ داکان مھالو 1 اکتوبر آ ہم فضائی بمب گواری ٹی پنچ شاری شہید و پنچ ٹپی مسنو۔ شہید کننگوک آتا چائنداری آمنہ بی بی زوجہ ثناءاللہ بلوچ، لال بی بی زوجہ اکبر و محمد حسن ولد یعقوب نا پن تیٹ مسنے۔
بلوچ یکجہتی کمیٹی نا رد ئٹ زہری ٹی حالت آک ہر گدرینگوکا دے پین زیات خراب مرسہ ءُ۔ ہندی آبادی آ اجتماعی سزا، کاروائی و بندغی حق آتا پامالی جہانی بندغی و اخلاقی قانود آتا پاش برخلافی ءِ۔
بیان ئٹ پاننگانے کہ اگہ ساڑی آپریشن زوت بند کننگتو گڑا زہری ٹی اسہ بندغی بحران ئس ودی مرو، انتئے کہ لس شاریک چرجوئی ئٹ فضائی جلہو و پلویڑ نا گواچی ءُ۔
بلوچ یکجہتی کمیٹی خواست کیک کہ زہری ٹی برجاء لشکری کاروائی زوت بند کننگ مرے، علاقہ نا پلویڑ ایسر کننگے، و جہانی برادری، بندغی حق آتا ادارہ غاک، و جہانی میڈیا زوت حالیت آتا نوٹس ہلے و پاکستان ئے بلوچ الس آ ظلم آتا جوابدہ کے۔
