یوکرین دعوی کرینے کہ ای روس ئنا فوجی اڈہ تا اسہ بھلو وڑ ئسے ئٹ ڈرون و میزائل جلہو ئٹی 40 فوجی جہاز تباہ کریٹ۔
دا کاروائی نا اسہ ویڈیو ئس شنگ کننگانے ہراٹی خننگک مریک کہ ڈرون جلہو آن پد جہاز آتے خاخر پلویڑ کرینے۔
یوکرینی کوالخواہ تا رِد ئٹ دا جلہو ئٹی 472 ڈرون، ہفت بیلسٹک و کروز میزائل کاریم ئٹ ہتنگانے۔ دا جلہو روس ئنا برخلاف یوکرین نا کُل آن بھلا جلہو پاننگ مننگ ءِ۔
دا جلہو اندنو وخت ئسے آ کننگا ہراتم روس و یوکرین نا نیام ئٹی جنگ بندی نا کوشست برجاء ءِ و ہڑتوما ڈیہک اسہ وار پدا ترکی نا شار استنبول ئٹی اوار ءُ۔
روس ئنا وزارت دفاع پک کرے کہ یوکرین درو سہب ئنا پنچ ریجنز ئٹی ایئر فیلڈ آ جلہو کرینے۔
وزارت ٹیلیگرام آ دا جلہو تِہ مرمنسک، ارکوتسک، ایوانو، ریازن، و امور ئٹ دہشتگردی نا جلہو پارے۔
وزارت نا رِد ئٹ جلہو تان ایوی ایشن نا کیہی مڈیک خاخر الکنو ہرافتہ پدا کھسفینن۔ ارکوتسک نا گورنر نا رِد ئٹ ٹرک آتیٹ سریدنی و سائبریا نا فوجی اڈہ تا جلہو کننگا۔
یوکرین نا سکیورٹی سروس نا رِد ئٹ ” آپریشن اسپائیڈرز ویب “ نا ارٹ و نیم سال آن منصوبہ بندی مننگ اس و داڑا صدر زیلنسکی تینٹ نظر تخنگ اس۔
روسی میڈیا نا پاننگ ءِ کہ مرمنسک و ارکوتسک نا فوجی اڈہ غاک دائسکان فعال ءُ۔
