بلوچ لبریشن آرمی نا ترجمان جیئند بلوچ تینا بیان ئسیٹی پارینے کہ بی ایل اے نا خاص بشخ “اسپیشل ٹیکٹیکل آپریشنز اسکواڈ” ایس ٹی او ایس” درو شال ئٹی اسہ کاروائی ئسے نا وخت آ کوزہ گیر پاکستانی لشکر نا خاص انگا کارندہ بابل محمد حسنی ئے کھسفے۔ دا کاروائی انٹیلی جنس ونگ “زراب” نا ڈھکوک حوال تا بنیات آ سرسوبی ئٹ کننگا۔
او پارے کہ بی ایل اے نا سرمچارک شال بروری روڈ اسٹاپ نا ہند آ کوزہ گیر پاکستانی لشکر نا کمک کار بابل ولد زبر محمد حسنی نا اُلاخ آ چکمکی آئی ای ڈی لچِفسہ اودے ٹک کریر، ہرانا بھرم ئٹی او ہمو وخت آ کھسک ہندن اونا سنگت نبیل ولد محمد امین قلات نا ہندی بھاز ٹپی مسک۔ جلہو ئٹی اوفتا اُلاخ تیبہ بھس مسک۔
ترجمان پارے کہ بابل ولد زبر محمد حسنی قلات نا ہندی کوزہ گیر پاکستانی لشکر و اونا ڈھکوک ادارہ آتا اسہ خاصو کارندہ ئس اسک، ہرا زمانہ ٹی بدنام ڈیتھ اسکواڈ نا کارندہ زکریا محمد حسنی تون مون پہ مون تفوک اسک۔ بابل حسنی قلات ئٹی اسہ سلاہ بند ٹولی ئسے نا بھلنی ئے کریکہ، ہرا قلات و ہیب کھیب ئنا ہند آتیٹی کاریم کریکہ۔
بابل حسنی کوزہ گیر لشکر نا بھلنی ٹی اسہ ٹارچر سیل ئس جوڑ کریسک ہراڑے زوراکی ئٹ بیگواہ کننگوک بندغ آتے آ بیدادی کننگاکہ۔ اونا ٹولی کیہی علاقہ تیٹی مورچہ جوڑ کریسک و سلاہ بند گشت کریرہ۔ قلات نا علاقہ گراپ ئٹی فوجی چوکی جوڑ کننگ ئٹی ہم فوج ئے دافتا کمک دوئی اسک ہندن سرخین و خڑک مر ئنا علاقہ تیٹی نا بھلنی ٹی دا ٹولی لس شاری تے آ ظلم و بیدادی کننگ ئٹی پاش اوار اسک۔ گیشتر دا کہ منگچر نا علاقہ کوہک ئٹی دا ٹولی بھاز ورنا تا زوراکی ئٹ بیگواہی ٹی ہم تد مسُنے۔
او پارے کہ بابل محمد حسنی نا ٹولی تو تفوک کھل بندغ آتا چائنداری مسنے۔ ہرافتے آ بی ایل اے نا انٹیلیجنس ونگ زراب چرجوئی ئٹ نظر تخنگ ئٹی ءِ۔ ہرا پاش یا ڈھکوک بابل محمد حسنی تو تفوک مسنو اوفتِہ بی ایل اے گڈیکو موقع ئے ایتک کہ بلوچ قومی لشکر نا مونا سلاہ بٹر نہ تو اوفتا ایسر ہم بابل محمد حسنی نا ڈول ئٹ مرو۔
