بلوچستان و کراچی آن پین شش بندغ پاکستانی لشکر دزگیر کننگ آن گُڈ بیگواہ کرینے۔
گوادر نا ٹی ٹی سی کالونی نا جہی، لیویز فورس ئنا کارندہ امجد ولد دلمراد ئے 11 مئی 2025 آ سیول اسپتال گودار آن پاکستانی لشکر دزگیر کرے ہراکان گڈ اونا ہچ ڈس اف۔ خاہوت حکومت و بندغی حق آتا تنظیم آتیان امجد نا آجوئی نا خواست کرینے۔
بلوچ اسٹوڈنٹس آرگنائزیشن بی ایس او خضدار زون ئنا صدر ماجد بلوچ ئے درے نن خضدار ئٹی اونا اُراغان زورکی ئٹ بیگواہ کننگانے۔
ـ ماجد بلوچ نا بیگواہی ئے، بی ایس او و ایلو تنظیم آک سختی ئٹ شیف خلکُنو۔
کراچی نا ہند ماڑی پور آن ہم زوراکی نا بیگواہی تا حوال مونا بسُنے۔
حوال تا رد ئٹ پاکستانی لشکر ننکان چھاپہ خلِسہ چھار بندغ دزگیر کننگ آن گُڈ بیگواہ کرینے۔ـ او فتیٹی صابر نا مار شیراز، صابر نا مار سیلان، فضل نا مار بابا و اسہ بندغ ئس اوار ءِ ہرا چاہنداری مننگ کتنے۔
اندن بلوچستان نا دریابی شار گوادر آن تدوکا ہفتہ ئٹ پاکستانی لشکر نا دو آن بیگواہ کننگوک عبداللہ ولد عابد ادیب آجو مسنے و تینا اُراغا سر مسُنے۔
اونا آجوئی نا حوال ئے اونا خاہوت پک کرینے۔
