بلوچ یکجہتی کمیٹی نا شنگ کروک بیان ئٹ پاننگانے کہ تنظیم نا کاریمی آ باسک بیبو بلوچ ئے درے نن پشین جیل ئٹ پولیس و ڈھکوک ایجنسی تا کارندہ غاک بیدادی نا گواچی کریر، ہراڑان بیبو بلوچ نا حالیت بھاز خراب مس۔ اودے بد انگا حالیت ئٹ کمبائنڈ ملٹری اسپتال کوئٹہ غا سر کننگا، ہراڑے زرہ ئس وخت النگ آن گڈ بیدس علاج آن دوارہ اندا حالیت ئٹ ہدہ جیل کوئٹہ غا سر کننگا، ہراڑے اونا حالیت اسہ وڑ خراب ءِ۔
یات مرے کہ 24 اپریل نا نن 8 بجہ غا کوئٹہ پولیس و سی ٹی ڈی نا کارندہ غاک جیل ئٹ بیدس قانود پُترینگسہ ڈاکٹر ماہ رنگ بلوچ، بیبو بلوچ و گلزادی بلوچ ئے بیدادی تا گواچی کریر۔ اندا وخت بیبو بلوچ ئے ہدہ جیل کوئٹہ غان زوراکی ئٹ بیگواہ کننگا۔ 24 ساہت زوراکی ئٹ بیگواہی آن گڈ بیبو بلوچ ئے پشین جیل آ سر کننگا، ہراڑے او نا کوٹی و غسل خانہ اسکان نظر تخنگ کن کیمرہ خلنگاسس۔
بیان ئٹ پاننگانے کہ بیبو بلوچ پشین جیل ئٹ سر مننگ آن گُڈ تینے آ مروک بیدادی تا برخلاف اسہ رنگ بین برانز آ تولوک اس۔ او استو دوارہ ہدہ جیل آ سر کننگ آن گڈ بین برانز ئے ایسر کرے۔ اسہ رنگ دہ دے آن بین برانز و بیدادی تا سوب آن اونا حالیت دا وخت بھاز خراب ءِ و ننے اونا جانجوڑی نا بارسٹ بھاز خلیس ءِ۔
او پاریر کہ نن اقوام متحدہ غان خواست کینہ کہ او بلوچ سیاسی راہشون تا جیل ئٹ رکھ و اوفتا یلہ مننگ کن تینا کڑدار ئے سر ایتر، انتئے کہ جیل ئٹ ننا راہشون آتون اسہ رنگ بیدادی نا تدینی تا سوب آن ننے اوفتا زند آتا بابت ئٹ بھاز خلیس ءِ۔
