بلوچ نیشنل موومنٹ (بی این ایم)نا بندغی حق آتا تنظیم پانک تینا اسہ بیان ئسیٹی پارینے کہ کاونٹر ٹیررازم ڈیپارٹمنٹ نا بھلو کچ ئسے نا دو آن شال ئنا ہدہ جیل ئٹی مہالو آن بندی بلوچ یکجہتی کمیٹی (بی وائی سی) نا باسک بیبو بلوچ ئے لٹ ئہ کُٹ و بیگواہی ئے بھاز شیف خلینہ۔
او پارے کہ ساڑی آ شاہد آتا رپورٹ نا رد ئٹ بیبو بلوچ ئے نادرستو ہند ئسے آ دننگ آن مہالو لٹ ئہ کٹ کننگا، ہڷ ئہ تور کننگا و زوراکی ئٹ جیل ئنا دزگیری آن گِھرِسٹ دننگا۔ داسکان دا سما اف کہ او اراڑے کن ءِ و اونا سلامتی نا بارو ئٹ بھاز خُلیس ارے۔
اونا پاننگ اسک کہ دا بیرہ اسہ تدینی ئس افک بلکن ریاستی زوراکی نا پاشو نشانی ئس ءِ ہرانا مسخت بلوچستان ئٹی پر امن مزاحمت ئے ایسر کننگ ءِ۔ زالبول باسک آتے آ سہدار نا وڑ ئٹ زوراکی کننگ ریاست نا زوراکی ئٹ بیگواہی، است ئنا ڈول ئٹ دزگیری و لٹ ئہ کُٹ نا مہم ئٹی پریشان کروکو کچ ئسے اسکان ودُّکی نا درشانی ئے کیک۔ نن بیبو بلوچ نا رکھ و سلامتی کن ریاست و اونا سیکیورٹی ادارہ آتے ذمہ وار سمجھِنہ۔ سیاسی بندی تیتو وے بندغی آ روشت ئے ایسر مروئی ءِ۔
پانک پارے کہ نن بیبو بلوچ نا زوت و وے شڑط آن آجوئی اونا ساڑی آ ہند و قانودی حیثیت نا بیان کننگ نا خواست کینہ۔
او پارے کہ سیاسی باسک، بھازیکا زالبول آتے تنک کننگ، لٹ ئہ کُٹ کننگ و زوراکی ئٹ بیگواہی تا ایسری کن بندغی حق آتا جہانی ادارہ آک زوت نوٹس ہلیر و پاکستانی ریاست آ بندغی حق آتا ذمہ واری تے پورو کننگ کن زور شاغِر۔ لٹ ئہ کٹ نا ذریعت ئٹ اختلاف ِرائے نا چُپ کرفنگ قومی و جہانی قانود آتا لتاڑ ءِ۔ بلوچ الس ئے خُلیفِسہ بے توار کننگ مفک۔
