حوال تا رد ئٹ زوراکی ئٹ بیگواہ کننگوک ورنا ئسے نا جون درے نن باغبانہ غان خننگانے ہرادے پاکستانی لشکر مونتس ئٹ کھسفنگ نا دعوی کرینے۔
ورنا نا چاہنداری محمد یوسف نا مار عبدالمالک نا پن ئٹ مسنے ہرا کلات نا علاقہ کوہنگ آن تعلقداری تخک۔
حوال تا رد ئٹ پن کروک ورنا ئے 11 اکتوبر 2024 آ پاکستانی لشکر تربت آن زوراکی ئٹ بیگواہ کریسس۔
پاکستانی لشکر دعوی کرینے کہ عبدالمالک بلوچ ئے مونتس ئٹ کھسفنگانے، ولے خاہوت نا پاننگ ءِ کہ عبدالمالک ئے زوراکی ئٹ بیگواہ کننگاسس و داسا دروغ ئنا مونتس ئٹ اودے شہید کننگانے۔
عبدالمالک بلوچ نا جون ئے اونا خاہوت نا حوالہ کننگا، و خاہوت اودے کلات ئٹ گُڈی ہند کرے۔
حوال تا رد ئٹ پن کروک ورنا نا خاہوت ئے استو باغبانہ غا دا پارِسہ خواہفنگا کہ نن نُما بندغ ئے نُما حوالہ کینہ۔ وختس کہ خاہوت اوڑے سر مس تو اوفتِہ اسہ کاغد ئس دستخط کن تننگا۔ خاہوت وے خوانندہ اسک و اندا سوب آن بیدس سرسوج و خواننگ آن کاغد آ دستخط کرے ہراٹی اوفتِہ ریفنگ ئٹ دروغ ئنا مونتس نا شاہدی جوڑ کننگانے۔
یات مرے کہ مالک بلوچ نا بیگواہی نا برخلاف اونا خاہوت کیہی وار کسر تِہ بند کرسا برانز کرینے و اونا آجوہی نا خواست کرینے۔ 3 و 4 مارچ آ کلات آن زوراکی ئٹ بیگواہ کننگوک 50 بندغ کن مروک برانز ئٹ ہم عبدالمالک نا خاہوت اوار اس۔
او وختا گپ تران کن بروک ڈل اوفتا آجوئی کن پانزدہ دے ئنا وخت خواہس و عبدالمالک ئے داسا دروغ ئنا مونتس ئٹ کھسفنگ نا حوال مونا بسنے۔
