کراچی ٹی بلوچ یکجہتی کمیٹی نا برانزی ریلی آ سندھ پولیس زوراکی کرِسہ بی وائی سی نا اِرا بنجائی سروک، لالا وہاب و سمی دین بلوچ تون اوار ایلو برانزی تِہ دزگیر کرِسہ تھانہ غا درے۔
بی وائی سی نا پارہ غان کراچی ٹی دا برانز بلوچستان ئٹی بلوچ سیاسی کاریم کروک و برانز کروک آتا زیہا ریاستی بیدادی، خلنگ و تنظیمی سروک آتا دزگیری نا برخلاف کننگ مننگ اسک۔
بلوچ یکجہتی کمیٹی نا ردئٹ اوفتا برانزی ریلی ئے کراچی پولیس موکل تتو و پولیس برانز کروکا تیا زوراکی کرِسہ ریلی ئے منتشر کرے۔
ولے ہموتم کراچی پریس کلب نا پیشن آ اسہ پین جاگہ ئسے آ ریلی ہم کشنگا ہرافتیٹی اوار بندغ آک بی وائی سی و بی ایل اے نا برخلاف نعرہ خلکُر و پلے کارڈ آتا زیہا بی ایل اے و بی وائی سی نا را ئتون خڑکی نا وڑو ہیت نوشتہ اسُر۔
کراچی نا صحافی تا ردئٹ سندھ پولیس نہ بیرہ اوفتِہ موکل تِس بلکہ کمک ترِسہ آسراتی ہم تِس حالانکہ شار ئٹی دفعہ 144 نافذ ءِ، ہراٹی الس ئنا مُچی تیا رکھ ءِ۔
