اسلام آباد ئٹی بلوچ نسل کُشی نا برخلاف برجاء انگا برانزئے پرغنگ کن پاکستانی ڈکھکوک ادارہ آتا کارندہ آک آئی ایس آئی،ایم آئی نا پاننگ آ بلوچستان حکومت بیگواہ آ بندغ آتا گدان نا مونا تینا برانزی گدان ئس اڈ تسُر۔
سیاسی،چاگڑدی،بندغی حق آتا باسک آتا پاننگءِ کہ بلوچستان حکومت نا نیمہ آن خلنگ مروک آ برانز ئنا بھلُنی ئے خضدار ئٹی ڈیتھ اسکواڈ نا سربراہ ذکریا محمد حسنی ایلم زاہد محمد حسنی و مستونگ ڈیتھ اسکواڈ نا مُسکوہی سربراہ سراج رائیسانی نا مار نگراں حکومت نا مُسکوہی وزیر اسپورٹ جمال رئیسانی کننگءِ۔
حوالکار نا رد ئٹ بلوچستان حکومت نا نیمہ آن خلنگ مروکا لشکری کارندہ تیکن اڈ مروکا برانزی گدان نا بندغ آک بیگواہ آ بلوچ آتا خاوت آتے تنگ کننگءُ۔
پاکستانی میڈیائے ہم پاننگانے کہ اوفک بلوچستان حکومت نا برانز ئے کوریج تیر۔
ایلو نیمہ آن پانزدہ دے آن برجاء انگا بلوچ زالبول آتا برانز میڈیا خننگپک ولے منہ گھنٹہ مُست خلنگ مروکا گدان ئے کوریج تننگءُ۔
دا رد ئٹ بلوچ یکجہتی کمیٹی نا رہشون و تحریک نا سربراہ ڈاکٹر ماہ رنگ تینا اسہ ویڈیو سیٹی پارے کہ بلوچستان حکومت نا نیمہ آن اینو ڈیتھ اسکواڈ نا کارندہ آتے ہتنگ مسُنے ہرافک بلوچ نسل کشی ٹی تُدءُ و ہرافتا برخلاف ننا دا تحریک مننگءِ۔
اونا پاننگءِ کہ دا بندغ آتا ساڈی مننگ ئٹی اینو کُل بیگواہ آ بندغ آتا خاوت آتے سیکیورٹی نا مسلہ ارے۔
او پارے اسہ نیمہ ئس بلوچستان حکومت مذاکرات نا پن ئٹ اسہ زالبول ئسے رائی کیک ایلو نیمہ آن ننا پُر ایمن تحریک ئے ختم کننگ کن دنو گروپ آتے ہیسُنے۔
او ایسر ئٹ پارے کہ حکومت بلوچستان نا سنجیدگی دادے کہ تینا سلاہ بند گروہ تے ہیسُنے و داڑے نعرہ بازی کننگءُ۔ ننا زی آ جلہو کننگ نا تیوعہ تیاری مننگءِ داکان پد انت ئس کہ مریک اونا ذمہ وار ریاست و بلوچستان حکومت مرو۔
