بلوچستان نا بنجائی شار شال ئٹ بلوچ آجوئی خواہوک تنظیم ‘براس’ نا جلہو تا خلیس نا سوب آن شار ئٹ سیکورٹی لشکر فوجی چوکی خلکنے۔ دا وختا شار ئٹ انٹرنیٹ و موبائل سروس ہم بند کننگانے۔
پاکستانی سکیورٹی کوالخواہ تا رد ئٹ دا گھامگیج انٹیلی جنس رپورٹ آن گڈ کننگانے ہرا بلوچ راجی آجوئی سنگر “براس” نا کنڈ آن مننگ کروک جلہو تا بارو ئٹ تننگانے۔
سیکورٹی کوالخواہ تا رد ئٹ 4 مارچ 2025 نا رپورٹ ئٹی پاننگانے کہ 200 آن 250 ‘تربیت ہلوک آجوئی خواہوک سرمچار’ شال ئٹی اہم انگا جہہ تہ ٹک کننگ کن ڈٹ بندی کرینو ہرافتیٹ کوئٹہ چھاؤنی، بالی پٹ، صوبائی پارلیمنٹ، فرنٹیئر کور نا ہیڈکوارٹر و ریلوے اسٹیشن اوار ءُ۔
داکان بیدس N-65 و N-25 دگ آتیا اہم انگا جہہ تہ ہم بند کننگ نا ڈٹ بندی کننگانے تاکہ سکیورٹی لشکر نا ردعمل ئے سُست کننگ مرے۔
رپورٹ نا رد ئٹ منہ آجوئی خواہوک تنظیم آک شاری علاقہ تیٹ متحرک ءُ، خاص وڑ ئٹ کوئٹہ نا سریاب روڈ نا علاقہ ٹی ہراڑے او جہی سہولت کار تا ذریعت ئٹ سلاہ و ایلو مڈی تہ دوئی کننگ کیرہ۔
دا گھامگیج تا سوب آن سکیورٹی لشکر شار ئے ہائی الرٹ تسنے و اہم انگا جہہ تا رکھ کن ودیک سکیورٹی نافذ کرینے۔
انٹرنیٹ سروس نا بندی تدوکا سکیورٹی گھامگیج تا وڑ ءِ, ہرا بلوچستان ئٹی تدوکا منہ سال ئٹی اسہ وڑ مونا بسنو۔ نومبر 2024 ئٹی، پاکستان ٹیلی کمیونیکیشن اتھارٹی (PTA) سیکیورٹی نا حالیت نا سوب آن بلوچستان نا جتا بشخ آتیٹ موبائل انٹرنیٹ سروس ئے بند کریسس۔
کوالخواک اُلس و سرکاری افسر آتہ پنت کرینو کہ او دا گھامگیج آتیا عمل کیر، سفر کپس و سرکاری ذرائع تیان رسینگوکا معلومداری تا ذریعت ئٹ حالیت آن سرپند مریر۔
