بیلجیم: بلوچ نیشنل موومنٹ (بی این ایم) نیدرلینڈ ہنکین نا جنرل سیکٹری دیدگ بلوچ، عبدالواحد بلوچ، رقیہ بلوچ و عمران حکیم بیلجیم ئٹی پارٹی نا نمایندگی ئے کرسہ پشتون قومی مُچی ٹی اوار مسُر۔
دا وختا دیدگ بلوچ پارے کہ بلوچ و پشتون قوم آک دیہاڑی، جغرافیائی، و دود ربیدئی وڑ ئٹ اسٹ ایلو تون گھنڈوک ءُ و ہڑتوماک اسہ وڑ ئنا لٹ ئہ پُل ئنا نظام و بیدادی تتون مون تننگ ءُ۔
او پاریر کہ بلوچ قوم آن بار پشتون قوم ہم ریاستی بیدادی، زوراکی نا بیگواہی، وے قانودی خون و مڈی تا لُٹ ئہ پل کون آ بیدادی تا گواچی ءِ۔ ننے آ اسہ ہندُنو ریاست ئس کوزہ کرینے ہرانا عمر ننا باوہ پیرہ غا تیان ہم کَم ءِ۔
بی این ایم نا باسک آک پاریر کہ راجی جُنز آتا سرسوبی اوڑدئی قربانی و مزاحمت ئٹی ءِ۔ بی این ایم مدام بیوس آ قوم آتتون اوار سلوک ءِ و پشتون قوم ئنا جہد ئٹی اوفتون اوار ءِ۔ اسٹ انگا دشمن نا برخلاف اوار مننگ وخت ئنا گرج ءِ تانکہ لُٹ ئہ پُل ئنا برخلاف اسہ سوگو ءُ مزاحمت ئس کننگ مرے۔
دیدگ بلوچ پشتون قوم ئنا تھورو ئے ہرفسہ دا اومیت نا درشانی ئے کرے کہ بلوچ و پشتون قوم آک تینا آجوئی و حق آتیکن اوڑدئی ئٹ جوانو حکمت عملی تینائی کرور۔
