بلوچ نیشنل موومنٹ نا فارن ڈیپارٹمنٹ نا مجلس 19 فروری 2025، چھار شمبے نا دے، بلوچ نیشنل موومنٹ نا چیئرمین ڈاکٹر نسیم بلوچ نا بھلنی ٹی اڈ تننگا۔
مجلس ئٹی فارن سیکریٹری فہیم بلوچ، ڈپٹی کوآرڈینیٹر نیاز بلوچ و فوکل پرسن حکیم بلوچ اوار مسُر۔ مجلس نا ایجنڈا سفارتکاری نا کاریم و فارن ڈیپارٹمنٹ ئٹی خالی آ عہدہ غا تہ پُر کروئی اسک۔
مجلس نا بھلنی ئے ڈاکٹر نسیم بلوچ کرسا پارے کہ نن پہہ مرینہ کہ پارٹی نا جتا محکمہ و ادارہ غا تا شونداری نہ بیرہ پارٹی نا سوگوی بلکہ راجی آجوئی نا جہد ئٹی اسہ اہمو گھامگیج ئس ثابت مرو۔
او پارے کہ بلوچ نیشنل موومنٹ نا باسک آک نن ئہ دے خواری کشنگ ءُ و جہانی تیبر آ بلوچ راجی ویل ئے پھاش کننگ کن وے دمدروکو جہد ئس کننگ ءُ۔
او ودیک پارے کہ ننے یخین ءِ کہ دا بھلا و چرجوئی ئٹ برجاء جہد ئٹی پارٹی نا کوشست، خاص وڑ ئٹ سفارتی محاذ آ بلوچ ویل ئے اسہ مستحکم توار ئس جوڑ کننگ نا جہد، جہانی تیبر آ الم سرسوب مرور۔ دانا اثر بلوچستان ئٹی برجاء زنک کشی نا ایسری و بلوچستان نا آجوئی نا دروشم ئٹ پھاش مرو۔
فارن ڈیپارٹمنٹ نا کوآرڈینیٹر نا عہدہ کن ڈپٹی کوآرڈینیٹر نیاز بلوچ نا پن ئے فہیم بلوچ و حکیم بلوچ اوڑدئی ئٹ تسر، ہراڑا چیئرمین ڈاکٹر نسیم بلوچ امنا کرے و دا وڑ اودے فارن ڈیپارٹمنٹ نا کوآرڈینیٹر گچین کننگا۔
فارن سیکریٹری فہیم بلوچ ڈپٹی کوآرڈینیٹر کن امریکہ ٹی تولوک بی این ایم نا باسک غلام رسول نا پن ئے تس و سلہ تس کہ او تحریک نا اسہ متکنو و لائخو سنگت ئس ءِ و فارن ڈیپارٹمنٹ ئٹی اسہ اہمو کڑد ئس سر تننگ کیک۔ دا وختا او ہرا خطہ ٹی تولوک ءِ او اسہ بھاز اہمو سیاسی و سفارتی مرکز ئس پاننگک۔
فہیم بلوچ پارے کہ ہرا وڑ پارٹی نا فارن ڈیپارٹمنٹ یورپی ڈیہہ تیٹی کاریم تہ برجاء تخانے، اندا وڑ ننے امریکی خطہ ٹی ہم پارٹی نا پوزیشن ئے سوگو کرسا سفارتی محاذ آ تینا جہد ئے تیز کروئی ءِ۔
او ودیک پارے کہ نن تینا سفارتی جہد ئے اسہ خطہ یا براعظم اسکان محدود کننگ کپنہ۔ امریکہ و کینیڈا ٹی پارٹی نا باسک آتا ساڑی مننگ و اوفتا وے دمدروکا جہد دا ہیت ئنا خواست کیک کہ اوڑے ہم پارٹی پروگرام ئے منظم، سوگو و جوانو وڑ ئسیٹ مونی دننگ مرے تاکہ نن تینا مشن، یعنی بلوچستان نا آجوئی نا سفارتی محاذ ئے پین سوگو کننگ کین۔
غلام رسول بلوچ نا عہدہ غا فارن ڈیپارٹمنٹ اوڑدئی ئٹ چئیرمین ڈاکٹر نسیم بلوچ نا امنائی ئٹ اودے ڈپٹی کوآرڈینیٹر کرے۔
