بلوچ یکجہتی کمیٹی نا بنجائی آرگنائزر ڈاکٹر ماہ رنگ بلوچ چاگڑدی حوالکاری میڈیا غا تینا شنگ کروک پوسٹ ئسیٹ پارینے کہ بلوچ ورنا تا بیدس عدالت خون ئنا تدینی تیٹ خطرناک حد اسکان ودکی مننگ ءِ۔ بیرہ مکران ئٹی تدوکا تو ئٹ کیہی ورنا تا ٹارگٹ کلنگ (ٹک کرسا خون) نا تدینیک مونا بسنو۔
او پارے کہ اینو ریاستی ڈیتھ اسکواڈ نا کارندہ غاک تمپ گومازی ٹی بلوچی زبان نا ورنا غا شائر، کریم بلوچ ئے ٹک کرسا شہید کرینو، و مُسہ دے مُست اندا علاقہ ٹی چنک سن معراج بلوچ ئے ہم ریاستی ڈیتھ اسکواڈ نا کارندہ غاک شہید کریسُر۔
اندن اونا ودیک پاننگ اس کہ بلوچ نسل کشی تینا سیم ئے سر مسُنے و دا نا پوسکنا چھول بھاز خطرناک ءِ۔ اول ورنا تہ زوراکی ئٹ بیگواہ کننگاکہ، ولے داسا اوفتہ مون پہ مون ٹک کرسا کھسفنگک۔
او پارے کہ ننے بحیثیت قوم سیوتی نا درشانی کرسا بلوچ زنک ایسری نا دا خطرناک پالیسی تون مون تروئی تمو انتئے کہ ریاست بلوچ سرزمین آ بلوچ آتہ منظم وڑ ئٹ کھسفنگ نا ڈٹ بندی کرینے۔
