بلوچ نیشنل موومنٹ نا مُسکوہی چیئرمین خلیل بلوچ شہدائے مستونگ ڈاکٹر منان بلوچ و سنگت آتا نُہمی برسی نا موقع آ اوفتے خراج عقیدت ندر کرسا پارے کہ بلوچ راجی تحریک نا تاریخی قربانی، استقامت و عزم ئنا ہندنو لازوال قصہ اریر ہرافتے وخت ئنا کُبینیک کم کننگ کپسہ۔ ہندا تاریخ نا اسہ رژنءُ بشخ ئسینا پن شہید ڈاکٹر منان بلوچءِ ہرا تینا دانائی، بصیرت و انقلابی سوچ اتون اوار راجی تحریک نا نظریاتی و عملی میدان ئٹی اسہ ناقابل فراموش کڑدار ئسینا حساب ئٹ یاد کننگ مرو۔
او پارے کہ اینو وختس نن شہید ڈاکٹر منان بلوچ نا نُہمی برسی آ اونا یات ئٹ سرہ ئے شیف کینہ گُڑا اونا قربانی ننے ہمو ساہت ئے یات ہیتک وختس پاکستانی لشکر مستونگ ئٹی اودے چار سنگت آتون اوار درندگی ئٹ شہید کرے۔ ریاست دا گُمان کریسس کہ ڈاکٹر منان و سنگت آتا دترئے شُلیسہ او ننا راجی تحریک ئے کمزور کرو ولے او دا پوہ مننگ آن زبہر اسک کہ بلوچ راجی جدوجہد نا بنیات آک شہید آتا دترتیٹ مظبوط مریرہ، نزور مفسہ۔
چیئرمین خلیل بلوچ پارے کہ ڈاکٹر منان بلوش کنکن تنیااسہ سیاسی سنگت ئس الو او کنا ایلُم، کنا سنگت و اسہ ہندنو رہشون ئس اسک ہرانا دانشمندی و فکر تنظیم ئے مشکل انگا حالیت تیٹی ثابت قدمی بشخا۔
اوڑتون گداریفوکا ساہت آک، پارٹی نا تہہ ئنا معاملہ تیا اوناحکمت عملی و بلوچ راجی تحریک کن اونا پاک انگا کمٹمنٹ کنا ذہن ئٹی مدام تازہ مرور۔ اونا شہادت کنے و ہر ہمو بلوچ فرزند ئے ہرا تینا وطن نا آجوئی نا تغ ئے خنک، پین ہمت و حوصلہ تسنو۔
او پارے کہ ڈاکٹر منان بلوچ نا وژن اسہ آزاد،خودمختار و ترقی یافتہ بلوچستان اسک ہراڑے ظلم و جبر ئنا ہچ پن و نشان مف، ہراڑے انسانیت، برابری و انصاف نا اصول تہ راج مرے، او نہ بیرا اسہ عقلمندءُ سیاسی راہشون ئس اسک بلکہ ہندنو دانشور و مدبر ئس ہم اسک ہرا ہر فیصلہ آن مست راجی مفاد آتے مُستی تخاکہ۔ اونا شہادت ننا جہد ئٹی پین ترندی و عزم ودی کرینے و اینو نن اونا نظریہ نا وارث نا وڑ ئٹ اونا کسر آ ثابت قدم ان۔
چیئرمین خلیل بلوچ پارے کہ شہید ڈاکٹر منان بلوچ زندہ ءِ انتئیکہ او اسہ نظریہ ئس اسک و نظریہ ئے کس خلنگ کپک۔ای بلوچ راج، بی این ایم نا سنگت آتیان و بلوچ راجی جہد کار تیان خواست کیوہ کہ او ڈاکٹر منان بلوچ نا شہادت ئے اسہ عہد وفا ٹی بدل کیر۔ ننے آ لازومءِ کہ نن اونا نیم مروکا تغ ئے گواچن کننگ کن ہر قربانی کن تیار مرین انتئیکہ دا سفر بیرا نسل آ تا افک بلکہ بروکا نسل آتا بقا، اوفتا وقار و اوفتا چاہنداری نا ضمانتءِ۔
