بلوچستان نا ضلع کیچ و خاران آن پاکستانی لشکر چھار بندغ دزگیر کننگ آن گڈ بیگواہ کرینے۔
کیچ آن بیگواہ کننگوک آتا چاہنداری فیض ولد کیا و بشیر ولد کینگی نا پن ئٹ مسنے۔ پن کروک بندغ آتِہ استو پاکستانی لشکر بلیدہ نا علاقہ مینار آن چھاپہ خلِسہ دزگیر کرینے اوکان پد تُومکا بیگواہ ءُ۔
خاہوت نا رد ئٹ لشکری کارندہ غاک اُرا غا چھاپہ خلِسہ اوفتِہ دزگیر کریر ہراکان گڈ ننے اوفتا بارو ئٹ حوال تننگ متنے کہ او اراڑے و امر ءُ۔
خاہوت بندغی حق آتا ادارہ غا تیان خواست کرسا پارینے کہ او ننا بندغ آتا آجوئی کن توار بڑز کیر۔
ایلو کنڈ آن حوال رسینگانے کہ درو ویگہ نا وختا کوزہ گیر پاکستانی لشکر خاران نا خلق کلی سراوان نا اِرا ورنا عاصم قمبرانی ولد محمد یعقوب قمبرانی و بلاول قمبرانی ولد محمد اقبال قمبرانی ئے دزگیر کننگ آن گڈ بیگواہ کرینے۔
پن کروک تومکا ورنا تا سن 13 و 14 سال ءِ۔ دا وختا ہڑتُما ورناک کوئٹہ ٹی خواننگ اسر و چھٹی تیا علاقہ غا بسوسر۔
حوال تا رد ئٹ درو ویگہ نا وختا ہڑتُما تینا خلک کلی سراوان آ ہننگ اسُر کہ کوزہ گیر پاکستانی لشکر و انٹیلیجنس ادارہ غاک اوفتِہ دزگیر کریر ہراکان گڈ اوفتا ہچ ڈس اف۔
