بلوچ یکجہتی کمیٹی و تمپ ئنا ہندی ظریف عمر، بلیدہ گلی نا ہندی نوید حمید نا خاہوت آک اواری ئٹ شہید فدا چوک آن ڈپٹی کمشنر آفس اسکان برانزی ریلی کشار و ڈپٹی کمشنر آفس نا مونا برانز کریر۔
برانزیک شہید فدا چوک آن بھلا بازار و پدا ڈی پی او آفس اسکان اہم انگا کسر تیا گشت کرسا انصاف نا خواست کریر۔
برانزیک بلوچستان ئٹی بیگواہی و بیدس عدالت کھسفنگ و غارتگری نا لڑ ئے بند کننگ نا خواست کریر۔
برانزیک ڈپٹی کمشنر آفس نا مونا برانز کریر ہراڑے مُست اے ڈی سی مقبول انور تون مزاکرات کننگا و پدا اے ڈی سی خلیل مراد نا بھلنی ٹی ڈل برانزی تا خواست آتِہ بنگ و بے قانودی پاکستانی لشکر نا دو آن کھسفنگ مروک ظریف عمر و نوید حمید نا خاہوت آک تینا خواست آتِہ مونی ہیسُر ہراٹی ظریف عمر نا خونی تا برخلاف ایف آئی آر کرسا آئین و قانود نا رد ئٹ سزا تننگ نا خواست کریر۔
برانزیک پاریر کہ ہراتم اسکان ننا خواست آک پورو متنو نن تینا برانز ئے شہید فدا چوک آ برجاء تخون۔
خیال ئٹ مرے کہ کھسفنگ مروک ظریف عمر، نوید حمید و کیچ ئنا جتا ہند آتیان بیگواہ مروکا بندغ آتا خاہوت آک ہنوکا دے تیان شہید فدا چوک آ برانز کننگ ءُ۔
برانز ئٹی بلوچ یکجہتی کمیٹی نا باسک آتون اوار سیاسی و چاگڑدی تنظیم آتا باسک آک و وکیل آک ہم اوار مرسا اوفتا مُختفی ئے کریر۔
