بلوچ قومی راہشون استاد واحد قمبر بلوچ نا زوراکی ئٹ بیگواہی ئے اِرا سال پورو مننگ آ بلوچ نیشنل موومنٹ( بی این ایم ) نا ترجمان تینا بیان ئسیٹی پارے کہ استاد واحد قمبر بلوچ ہنوکا اِرا سال آن پاکستانی لشکر نا زندان ئٹی قید ءِ ۔ او بلوچ قوم ئنا پنی ءُ راہشون ئسے ، ہندا سوب آن اودے جنگی قیدی نا درجہ ترسہ زوت مونا ہتنگ مرے۔
ترجمان پارے کہ بلوچستان پاکستان نا قوضہ ٹی اسہ قوضہ مروک ءُ وطن ئسے ، او استاد واحد قمبر بلوچ تینا وطن نا آجوئی نا جدوجہد ئٹی پنی آ راہشون تیتون حساب مسُنے ۔ آجوئی نا تحریک نا اُلسی جدوجہد نا دروشم ئٹ تِروک اونا کڑد بھاز اہم ءُ فیصلہ ئس مسُنے ۔
او پارے کہ 19 جولائی 2024 آ استاد واحد قمبر بلوچ ئے ایران نا شار کرمان ئٹی پاکستانی ڈھکوک ادارہ تا کارندہ آک بیگواہ کرینو، ہراڑے او تینا اُست ئنا علاج کن تینا سیال آتا جہہ آ رہینگاسُس۔
ترجمان مُستی پارے کہ جہانی قومی قانود و بندغی اقدار آتا روشنائی ئٹ استاد واحد قمبر بلوچ ئے جنگی قیدی نا درجہ تننگ مرے ۔ حوال تا رِد ئٹ اودے جیل ئٹی بدَنی و ذہنی تشدد کننگ ءُ تانکہ اودے ذہنی وڑ ئٹ اونا نظریات نا برخلاف بیان ہلننگ مرے ۔ او پیر ءِ، ناجوڑ ہم ارے ، ہراڑان اونا صحت و جان ئنا رد ئٹ بھاز خُلیس ارے۔
ترجمان پارے کہ بندغی حق آتا جہانی قومی ادارہ غاک پاکستان ئے بندغی حق آتا پاسداری کن مجبور کننگ ئٹ بے سوب مسنُو ۔ پاکستان جہانی قومی برادری آن جتا ءُ تجارتی و سفارتی مراعات کننگ ءِ ، ہرانا بنیاتی شڑط جمہوری اقدار، قانون نا حکمرانی و انسانی حق آتا احترام ءِ ، ولے ریاست پاکستان او شڑط آتے پورو کننگ ئٹ وار وار آ بے سوب مننگ ءِ۔
او خواست کرے کہ جہانی برادری پاکستان آ پابندی خلے ، انتئے کہ بلوچستان ئٹی بندغی حق آتا حالیت چرجوئی ئٹ خراب مننگ ءِ و زوراکی ئٹ بیگواہی ، بیدس عدالت آن کوش، مُچی وڑ ئٹ سزا و سیاسی جبر ئٹی چرجوئی ئٹ ودُکی مننگ ءِ۔
