دریابی شار گوادر آن پاکستانی لشکر نا دو آن بیگواہ مروک اسہ پین بندغ ئسے نا چائنداری مسنے اندن تمپ ئٹی پاکستانی لشکر نا دو آن بیگواہ مروک بندغ نا جون خننگانے۔
گوادر آن بیگواہ کننگوک بندغ دین محمد نا مار کمال نا پن ئٹ درست مسنے ہرا تربت ناصر آباد نا جہی سے ہرا گوادر ئٹ فقیر کالونی فضل بشیر تون دزگیر مسس ہراکان گڈ تومکا بیگواہ ءُ۔
حوال تا رد ئٹ پن کروک بندغ ئے داکان مُست ہم پاکستانی لشکر دزگیر کرسس و منہ وخت آن پدا یلہ کریسس۔
ایلو کنڈ آن بلوچستان نا ضلع کیچ ئنا علاقہ تمپ دازن ئٹی پاکستانی لشکر نن نیمہ غا چھاپہ خلِسہ جہی مخلوق ئے بیدادی نا گواچی کریسس و اسہ بندغ ئس دزگیر کرسا تینتو دریسس ہرا نا داسا جون خننگانے۔
پن کروک بندغ اومر نا مار زہیر نا پن ئٹ درست مسنے۔
پن کروک بندغ ئے پاکستانی لشکر دزگیر کننگ آن گڈ تینا کیمپ آ دریسس ہرادے بیدادی نا گواچی کرسا کھسفینے و اونا جون ئے اُرا نا خُڑک خسانے۔
جون ئنا خننگ آن گڈ اونا خاہوت جون ئے ہرفِسہ برانز بناء کرینے و تربت آ سر مسنے۔ اوفتا پاننگ ءِ کہ ایسکان اوفتِہ انصاف ملپک او برانز ئے برجاء تخور و جون ئے گُڈی ہند کروفس۔
او جہی سیاسی، چاگڑدی و بندغی حق آتا ادارہ غا تتون اوار زند ئنا غٹ شعبہ غا تیان تعلقداری تخوک بندغ آتیان خواست کرینو کہ او دا بلوچ زنک کشی نا برخلاف بش مرسا اوفتون اوار مریر۔
