بی وائی سی نا رہشون سمی دین تینا درشان ئسیٹی پارے کہ اسہ تو ئسیان اودے تنگ کننگ آن پد استو یک بجہ نا وخت فوج و پولیس نا 22 لاری ہرافتیٹی 60,70 کارندہ سوار اسُر، لیڈی پولیس کارندہ آک ہم تُد اسُر، کنے دزگیرکننگ کن بسوسُر۔
سمی دین نا رد ئٹ چھاپہ نا وخت او اُراٹی ساڑی الو، کارندہ آک اُرانا دروازہ غاتے پرغسا اُراٹی پیہانو و پنچ گھنٹہ اسکان اُراٹی ساڑی مسنو۔ چھاپہ نا وخت تیبہ اُرا ئے پٹ ئہ پول کرینو و اُراٹی تخوک لیپ ٹاپ، کیمرہ، موبائل فوج، کتاب، کاغد و خیسُن تے تینتون درینو۔
بی وائی سی نا رہشون پارے کہ اوفتا مسخت کنے دزگیر کننگ مسُنے، او چائسنو کہ ای اُراٹی افٹ پدا ہم کنا اُرانا دروازہ آتے پرغنگ و اُراٹی پیہنگ نا مسخت انت ءِ، کنا اُرانا قیمتی آ سامان تے دُزنگ، گڑاتے پرغنگ و ہمسایہ تے آ زوراکی و تنگ کننگ نا انت مسخت ءِ؟ ہرا قانود نا رد ئٹ دُن کننگ ءُ؟
سمی دین پارے ای کیہی وار پارینٹ کہ اگہ کنا برخلاف آ ہمرو مقدمہ ئس ارے ای اوفتے قانودی فورم تیا مون تننگ کن تیار اُٹ، واہم اسہ پُر ایمن بندغی حق آتا باسک ئسینا اُراغا شام ئنا اوندائی ٹی چھاپہ خلنگ، ہمسایہ تے آ زوراکی و تڑی تیٹ خوفزدہ کننگ و کنا خاہوت ئے تنگ کننگ دا ہیت ئے پاش کیک کہ اوفتا مسخت قانود تا پیلو کننگ اف بلکن کنے و کنا خاہوت ئے خلیفنگ و بے توار کننگ ءِ۔
سمی دین ایسر ئٹ پارے کہ کنا اُرا ئے مروکا نسخان و دا کاروائی تا ذمہ واری بغدادی پولیس، لیاری پولیس و سندھ حکومت نا زیہاٹے۔
یات مرے کہ سمی دین نا باوہ ڈاکٹر دین محمد بلوچ ہنوکا 17 سال آن پاکستانی فوج ئنا دو آن زوراکی ئٹ بیگواہ ءِ ہرادے 28 جون 2009 آ پاکستانی فوج خضدار آن زوراکی ئٹ بیگواہ کریسس۔
سمی دین بلوچ نا برخلاف بلوچستان و سندھ ئٹی کیہی مقدمہ کننگانے و اودے کیہی وار کراچی پولیس دزگیر کرینے ولے سندھ ہائی کورٹ اودے آجو کرفینے۔
