بلوچ نیشنل موومنٹ نا چیئرمین ڈاکٹر نسیم بلوچ پاکستانی لشکر نا دو آن زوراکی ئٹ بیگواہ کننگوک کماش بلوچ راہشون استاد واحد کمبر نا بابت ئٹ چاگڑدی حوالکاری تلہ ایکس آ تینا اسہ پوسٹ ئسیٹ پارے کہ پاکستان بین الاقوامی قانود تا رد ئٹ استاد واحد کمبر ئے جنگی قیذی نا وڑ ہرِہہ۔
اونا پاننگ اسک کہ استاد واحد کمبر، اسہ آزموندئی ءُ بلوچ سیاستدان و مزاحمت آ پرزور حامی، کیہی کرن آتیان آزاد بلوچستان کن جہد کرینے۔ 1970 نا کرن ئٹ، تینا ورنائی نا وخت، او پاکستان نا کوزہ نا برخلاف سلاہ بند مزاحمت ئٹ سوس مسک ہرا عزم ئے اینو اسکان او برجاء تخنگ ءِ۔
او پارے کہ دا افسوسناک ہیت ئسے کہ جولائی ئٹ اودے پاکستان نا ڈھکوک ایجنسی تا اواری و ڈرگ مافیا تیتوں اوار ملِسہ ایران نا شار کرمان آن برمتہ کننگا۔ تینا برمتہ کننگ آن پد، استاد واحد کمبر بیگواہ ءِ، قانودی مشیر یا خاہوت اسکان کس ئے اونا بارو ئٹ ہچو حوال تننگتنے۔
ڈاکٹر نسیم بلوچ نا پاننگ اسک کہ اونا مسڑ مہلب واحد پارینے کہ دا ہیت اسہ دروغو اعتراف ئس کننگ کن بھاز دباؤ ئٹی ءِ، کہ اونا سیاسی جہد اسہ جرم ئسے و او تینا بندغ تا آجوئی کن تینا تیوہ غا زند ئنا اواری آ افسوس نا درشانی کے۔
او پارے کہ دا ظلم اونا وقار و بندغی حق آتا پھاش لتاڑ ءِ۔ پاکستان سیاسی اختلاف ئے چپ کرفنگ کن تینا برجاء پالیسی تِہ برجاء تخِسہ ء، خاص وڑ ئٹ بلوچ راہشون، باسک و دانشور تِہ ٹک کننگ۔
بی این ایم چیئرمین نا پاننگ اسک کہ اونا زوت آجوئی و بلوچستان نا آجوئی نا وکالت کروکا سیاسی راہشونک و باسک آتا پاکستان نا زوراکی ئٹ بیگواہی تا ایسری نا خواست کرسا پارے کہ جہانی کہول ئے مداخلت کننگ مرے۔ پاکستان ئے جہانی قانود آتا رد ئٹ استاد واحد کمبر ئے جنگی قیذی پاننگ مرے و اوڑتون ہمو وڑ سلوک مرے۔
