بلوچستان نا ضلع ژوب آن بیگواہ کننگوک بندغ ئسے نا جون خننگانے۔ ڈیرہ اسماعیل خان ئٹ سی ٹی ڈی مونتس ئٹ اِرا بندغ کھسفنگ نا دعوی کرینے۔
حوال تا رد ئٹ ژوب ئنا جہی محمد ایوب مندوخیل نا جون اینو کلی گداخیل ئٹی سپروکاڑ آن خننگانے ہرا کیہی دے آن بیگواہ اسک۔
ہندی انتظامیہ جون ئے اسپتال آ درے۔ اسپتال انتظامیہ نا رد ئٹ جون ئے کیہی دے مسنے و جون ئے پوسٹ مارٹم کن شال آ راہی کننگانے۔
ایلو کنڈ آن ڈیرہ اسماعیل خان نا تحصیل درابن کلانچی ٹی سی ٹی ڈی مونتس ئسیٹی اِرا بندغ کھسفنگ نا دعوی کرینے۔
حوال تروکا پارینو کہ بدنام زمانہ کاؤنٹر ٹیررزم ڈیپارٹمنٹ دعوی کرینے کہ اوفک یوسف و ظاہر خان پنیئو اِرا بندغ کھسفینو ہرا کلانچی نا جہی ءُ۔
خیال ئٹ مرے کہ سی ٹی ڈی ساندہ بلوچستان، خیبرپختونخوا و سندھ ئٹ زوراکی ئٹ بیگواہ کننگوک بندغ آتِہ کھسفِسہ مونتس نا پن تسنے۔
تُدوکا ہفتہ سی ٹی ڈی بلوچستان نا ضلع موسیٰ خیل ئٹی زوراکی ئٹ بیگواہ کننگوک چھار بندغ دروغ ئنا مونتس ئٹ کھسفیسس، ہرافتیٹ مُسٹ نا چاہنداری ئے خاہوت آک کریسر، ہرافتِہ پاکستانی لشکر اینخو ستمبر و اکتوبر نا تُو ئٹی زوراکی ئٹ بیگواہ کریسس۔
