بلوچستان نا ضلع کیچ ئنا علاقہ مند ئٹی اُرا تیا پاکستانی لشکر نا کوزہ نا برخلاف برانز برجاء، چُنا نیاڑی تا بھلو کچ ئس برانز ئٹ اوار ءِ۔
برانزی تا پاننگ ءِ کہ پاکستانی لشکر ننا اُرا تیا کوزہ کرینے و بش مننگ نا پن ئے ہلنگ اف، داسا نن ودیک سگھنگ کپنہ۔
اوفتا پاننگ ءِ کہ اول ننا اُرا تیا کوزہ کننگا و داسا اُرا نا مونا ڈغار تتون اوار ایلو جہہ تیا کوزہ کننگ نا کوشست کننگ ءُ۔
برانزی تتون جہی انتظامیہ آن ویتہ زبیدہ جلال نا ایڑ رحیمہ جلال و ایلو بسر اوڑدئی کریر و برانز ئے ایسر کننگ نا خواست کریر۔
ولے برانزیک پاریر کہ ایسکان پاکستانی لشکر ننا اُرا تیان پیشتمپک نن انداڑے مرون۔
او علاقہ نا مخلوق آن و بلوچ قوم آن خواست کریر کہ او بریر و برانز ئٹ اوار مرسا ننتو کمک کیر و ریاستی تادی تا برخلاف توار بڑز کیر۔
