وائس فار بلوچ مسنگ پرسنز نا چئرمین نصراللہ بلوچ تینا اسہ بیان ئس شنگ کرسا پارینے کہ راولپنڈی اسلام آباد آن دہ بلوچ خوانندہ نا زوراکی ئٹ بیگواہی و مُسہ دے گدرینگ آن پد ہم اوفتِہ وے پھاش کننگ ریاستی قانود و بندغی حق آتا سخت لتاڑ ءِ ہرا نا سخت انگا لوز آتیٹ مذمت ئے کینہ و بنجائی حکومت آن خواست کینہ کہ او بلوچ خوانندہ غا تا ڈیہہ ئنا ادارہ غا تا دو آن بیدس قانود دزگیری آ دمدستی پام تے و اوفتا سرسلامت آجوئی ئے پک کے۔
نصراللہ بلوچ خوانندہ غا تا زوراکی نا بیگواہی نا شابیت حوال تِہ ترسا پارے کہ 31 اکتوبر آ راولپنڈی نا آئی جے پی میٹرو اسٹیشن نا خُڑک بلوچ خوانندہ غا تا فلیٹ آ نن ئنا یک بجہ نا وخت آ ریاستی سیکورٹی ادارہ غا تا کارندہ غاک چھاپہ خلکر و اوڑے ساڑی غُٹ خوانندہ غا تِہ زوراکی ئٹ بیگواہ کریر۔
او پارے کہ بیگواہ کننگوک خوانندہ غا تیٹ نمل یونیورسٹی اسلام آباد نا 10 خوانندہ اوار ءُ، ہرافتیٹ سالم عارف، بالاچ فدا، خدا داد، خلیل احمد، خلیل اقبال، حمل حسنی، بابر عطا، نور مہیم، افتخار عظیم، و احسام اکبر اوار ءُ، ہرافتا سیمسٹر مڈ ٹرم امتحانک چلنگ ءُ۔
اونا پاننگ اس کہ 1 نومبر آ خوانندہ غاک راولپنڈی نا نیو ٹاؤن تھانہ ٹی تینا 10 بیگواہ کننگوک سنگت آتا آجوئی نا رپورٹ کننگ نا کوشست کریر ولے پولیس ایف آئی آر کننگ آن نمن مس۔
