زوراکی نا بیگواہی تا برخلاف بلوچ اسٹوڈنٹس ایکشن کمیٹی نا کُنڈ آن کیہی شار تیٹ برانزی منّنگ ئٹی ءِ۔
بلوچستان یونیورسٹی نا خوانندہ سہیل بلوچ و فصیح بلوچ نا زوراکی ئٹ بیگواہی ئے مُسہ سال پورو مننگ آ اینو نوشکے ٹی بلوچ اسٹوڈنٹس ایکشن کمیٹی نا پڑو آ خوانندہ غا تا کنڈ آن ریلی ئس کشّنگا و برانز کننگا۔
دا وخت آ ریلی ٹی بشخ ہلوکاک نوشکے پریس کلب نا مون آ تولوک برانز کریر و بیگواہ کننگوک بندغ آتا آجوئی کن نعرہ خَلکُر۔
ریلی ٹی تران کروکا پاریر کہ بلوچ ورنا تہ خواننگ جاہ تیان بیگواہ کرسا اوفتا بروکاتم (مستقبل) ئے نسخان تننگک، اگہ ننا بندغ آتا دوبہ ئس ارے تو اوفتہ عدالت آتا ہتنگ مرے اوفتا ڈوہ ئے پھاش کننگہ ننا بندغ آک سال تا سال بندی کننگرہ۔
ریلی ٹی نوشکے آن زوراکی ئٹ بیگواہ کننگوک بندغ آتا خاہوت آک و چُناک ہم بشخ ہلکُر ہرا تینتو تینا بندغ آتا عکس ہفّسہ اوفتا آجوئی نا خواست کریر۔
بساک نا کنڈ آن سہیل بلوچ و فصیح بلوچ نا زوراکی ئٹ بیگواہی ئے مُسہ سال پورو مننگ آ بلوچستان نا کیہی علاقہ غا تیٹ برانز آتا چرجوئی برجاء ءِ، ہراڑے شال، خضدار، تربت و اوتھل ئٹی خوانندہ غاک برانز کرسا بیگواہ کننگوک بندغ آتا آجوئی نا خواست کرینو۔
