گوادر آن بیگواہ کننگوک اِرا ورنا پھاش کرسا سی ٹی ڈی نا دو ٹی تننگانے۔ اندن بلیدہ غان بیگواہ کننگوک اسہ ورناس آجو مرسا تینا اُرا ئے سر مسنے۔
حوال تا رد ئٹ پاکستانی لشکر نا دو آن زوراکی ئٹ بیگواہ کننگوک دشت محلہ بشولی نا جہی حمزہ نا مار ایوب و دشت مسکر نا جہی مہراج ئے پھاش کرسا سی ٹی ڈی نا دوٹی تننگانے۔
تومکا ورنا تِہ پاکستانی لشکر اینخو 26 ستمبر نا نن گوادر نیو ٹاون آن دزگیر کننگ آن گڈ بیگواہ کریسس۔
حوال تا رد ئٹ ورنا تا برخلاف دروغ ئنا ایف آئی آر کرسا ٹی ڈی نا دوٹی تننگانے۔
یات مرے پن کروک ورنا تتون حسین نا مار اعجاز ہم بیگواہ کننگاسس ہرادے اِرا دے مُست یلہ کریسر و تینا اُراغا سر مسس۔
اندن بلیدہ غان پاکستانی لشکر نا دو آن زوراکی ئٹ بیگواہ کننگوک مسلم عارف آجو مرسا تینا اُراغا سر مسنے۔
اونا خاہوت نا رد ئٹ 15 سالی مسلم ئے 15 جون 2023 آ پاکستانی لشکر دکان آن دزگیر کننگ آن گڈ بیگواہ کریسس ہرا اینو آجو مسنے۔
یات مرے، مسلم نا زوراکی ئٹ بیگواہی نا برخلاف اونا خاہوت بلیدہ آن تربت اسکان لانگ مارچ تون اوار برانز ہم کریسس۔
