بلوچستان لبریشن فرنٹ نا ترجمان میجر گہرام بلوچ میڈیا ئے شنگ کروک تینا درشان ئٹی پارینے کہ 18 اکتوبر 2024 آ سرمچارک قلات نا ہند نیچاری ٹی گشت کننگ اسُر کہ او لیویز کارندہ غا تتون ڈک کنگر، لیویز کارندہ غا تیان اوفتا سلاہ تِہ پُھلنگ آن پد اوفتِہ یلہ کریر، و ہموزدے ویگہ نا دو بجہ نا وختا سرمچارک پولیس چوکی آ ہنار و لیویز کارندہ غاتِہ خبڑدار کریر کہ او بلوچ راجی تحریک نا مونا ہڑاند مننگ و سرمچار تا رند ئٹ تمنگ آن پد مریر نہ تو اوفتِہ دا راجی ڈوہ کن عبرتی ؤ سزا تون مون تروئی تمو۔ ولے لیویز کارندہ غاک ہیت ئے بِننگ نا جاگہ غا سرمچار تیا جلہو کریر ہرانا ورندی ٹی سرمچارک دفاعی پوزیشن ہلِسہ مورچہ ئے توریر۔ دفاعی جلہو نا سوب آن لیویز سپاہی عبدالقیوم کھسک و سپاہی رحمت اللہ نیچاری ٹپی مس۔
او پارے کہ اسہ راجی تنظیم ئسے نا حیثیت ئٹ ننے بلوچ آتا نہادی آ ساہ تا نسخان آ بھاز افسوز ارے و نن خاہوت تون اُست ئٹ ہمدڑدی تخِنہ ولے دا تُدینی آن مسُت نن کیہی وار پولیس و لیویز ئٹی حاضر سروس بلوچ آتِہ خبڑدار کریسن کہ او راجی تحریک نا برخلاف کاریم تیٹ اوار بلوچ سرمچار تا مون آ ہڑاند مننگ آن پد مریر۔
میجر گہرام بلوچ پارے کہ اینو اَسہ وار ئس ولدا نن تنظیمی بیانیہ ئے بھیرو کینہ بلوچ آ تا جان و مال ننے دوست ءِ انتئے کہ ننا جہد ئنا ماس بلوچ راج و بلوچستان ءِ۔ جہان نا ہر کوزہ گیر نا وڑ اینو پاکستان ہم کوزہ کروکا خطہ ٹی تین پہ تینی نا جیڑہ ودی کرسا ویل آتِہ ودفنگ نا پالیسی تیا گھام خلنگ ءِ۔ دا حساس حالیت ئٹی ننا زمہ واری جوڑ مریک کہ ریاستی مشینری تا ایندھن جوڑ مننگ نا جاگہ غا ننے تینا راجی زمہ واری تا مارشت مرے۔
اونا پاننگ اس کہ اینو ولدا پھاش کننگ خواہینہ کہ کوزہ گیر نا جتا محکمہ تیٹ ساڑی بلوچ آک ریاستی تادی تِہ تاغت تفسس۔ اگہ دانا برخلاف کس ٹولی و بندغ ئس ریاستی ظلم ئنا بشخ مرسا تینا بندغ آتا استحصال ئٹی کوزہ گیر کن کمکار نا کڑد ادا کیک تو راجی عدالت ئٹی اوڑان حساب ہلنگ مرو۔
اونا ودیک پاننگ اس کہ نن اسہ وار ئس ولدا لیویز ئے خبڑدار کینہ کہ او بلوچ مخالف کاریم تا بشخ مفس ہلہ آنہہ گُڑا او تینا زمہ وار تینٹ مرور۔
ترجمان ایسر ئٹ پارے کہ بلوچستان لبریشن فرنٹ دا جلہو نا زمہ واری ئے ہرفک و ہر ہمو بندغ ئے ٹک کرو ہرا ریاستی مخ تفی ٹی بلوچ تحریک ئے نسخان رسیفنگ ءِ۔
