بلوچستان نا شار قلات آن پاکستانی لشکر اُرا سے آ چھاپہ خلِسہ حب ئنا جہی ورنا یاسر حمید ئے بیدادی نا گواچی کرسا و تینتو درے۔
عبدلحمید نا مار یاسر حمید حب ئنا علاقہ بھوانی نا جہی ئس ءِ و قلات ئٹی تینا سیال آتا اُراغان پاکستانی لشکر نا دو آن زوراکی ئٹ بیگواہ کننگانے۔
جہی حوال تا رد ئٹ 11 اکتوبر آ ننکان دو نیم نا وختا پاکستانی لشکر نا بھلو کچ ئس علاقہ ئے گھیرہ کرسا اسہ اُرا ئسے آ چھاپہ خلک و اُرا نا مڈی تِہ نسخان تس پرغا، نیاڑی تتون اوار ایلو بندغ آتیا بیدادی کرے و یاسر حمید ئے لٹ کُٹ کرسا تینتو درے ہراکان گڈ اونا ہچ حوال اف۔
خیال ئٹ مرے یاسر حمید، جنید حمید نا بھلا ایلم ءِ ہرادے 8 اکتوبر آ حب آن زوراکی ئٹ بیگواہ کننگاسس و اینو اونا ایڑ پریس کانفرنس کرسا اونا آجوئی نا خواست کریسس۔
یاسر حمید ئے داکان مُست مئی 2023 آ زوراکی ئٹ بیگواہ کننگاسس و دہ دے آن پد یلہ کننگاسس و داسا ارٹمیکو وار پاکستانی لشکر نا دو آن زوراکی ئٹ بیگواہ کننگانے۔
