بلوچستان نا ضلع خضدار نا تحصیل زہری ٹی اسہ بمب تراک ئسے نا حوال رسینگانے ہراٹی اسہ بندغ ئس کھسکنے و اسٹ ٹپی مسنے۔
حوال تا رد ئٹ زہری ٹی صدام گراونڈ نا خڑک بمب تراک ئس مسنے ہراٹی زہری نا وائس چیئرمین راوت خان زہری نا چنکا ایلم و لیویز کارندہ عبدالحمید کھسکنے و محمد خان لوٹانی پنی آ اونا اسہ سنگت ٹپی مسنے ہرافتِہ اسپتال آ راہی کننگانے۔
ہندی حوال تا رد ئٹ تراک نا توار مُر مُر اسکان بِننگ مسس۔
لیویز تون اوار ایلو پاکستانی لشکری کارندہ غاک تدینی نا ہند آ سر مرسا کاروائی بناء کرینو۔
زہری لیویز کوالخواہ تا رد ئٹ تراک لچفوکو بمب ئسے نا زریعت ئٹ کننگانے و دا بارث ئٹ ودیک پٹ ءَ پول برجاء ءِ۔
