بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ سرمچارک پنچ اکتوبر ہفتہ غا ویگہ نا پنچ بجہ غا کیچ ئنا ہند مند چکاپ ئٹی ساڑی کوزہ گیر پاکستانی لشکر نا بھلا کیمپ ئنا چوکی ئے اِرا کنڈ آن بھلا و پوسکنا سلاہ تیٹ ٹک کریر۔
او پارے کہ دا جلہو ئٹی بی ایل ایف نا اسنائپر شوٹر مُست دشمن نا اِرا کارندہ ئے ٹک کرسا خلک۔ اوکان پد سرمچارک پانزدہ منٹ اسکان چوکی ئے پوسکن و بھلا سلاہ تیٹ ٹک کریر ہرانا پلویڑ ئٹی برسا ایلو لشکری کارندہ غا تِہ جانی و مالی نسخان ہرفوئی تما۔
اونا پاننگ اس کہ دا جلہو ئٹی دشمن نا چوکی نا اسہ بشخ ئس تیبہ بھُس مس۔ دشمن تینا بےسوبی تِہ ڈکھنگ کن تینا کھئوک و ٹپی مروکا لشکری کارندہ غا تا کچ و چاہنداری ئے ڈھکنگ نا بےسوب کوشست کننگ ءِ تاکہ لشکر نا مورال پنِپ۔
ترجمان پارے کہ جلہو آن پد خلیس نا گواچی مروکا دشمن مشی آ جہہ تیٹ مارٹر خلک و سرمچار آتا رند ئے ہلنگ نا کوشست کرے ولے سرمچارک سرسلامتی ئٹ تینا رکھکوک جاگہ غا تیا سر مسر۔
اونا ودیک پاننگ اس کہ بی ایل ایف السی تنظیم ئس ءِ و بی ایل ایف نا ہر کاروائی ڈٹ بندی و ڈکھکوک محکمہ نا تیبہ پٹ ءَ پول آن پد کننگک تاکہ موثر و منظم کاروائی تیٹ دشمن ئے گیش آن گیش نسخان تننگِہ و ذہنی و نفسیاتی دباؤ ٹی گیشتر ودی برے و دا حکمت عملی گوریلہ جنگ ئنا زیبائی ءِ۔
میجر گہرام ایسر ئٹ پارے کہ بلوچستان لبریشن فرنٹ دا جلہو نا زمہ واری ئے ہرفک و آجو بلوچستان اسکان دشمن لشکر ئے ٹک کرسا کرو۔
