بی این ایم نا بندغی حق آتا ادارہ پانک کیچ ئنا ہند بلیدہ، بِٹ آن چار بلوچ ورنا تا زوراکی ئٹ بیگواہی نا مذمت ئے کرسا پارینے کہ یاسر ولد حاجی نیک سال، شمس الرحمان ولد ماسٹر شئے بجار، سیف اللہ ولد ظہور احمد و شیہک ولد بشیر احمد ئے 06 اگست 2026 ئنا سوب ئنا پاکستانی فوج و ڈھکوک ادارہ آک اُراتا چھاپہ خلِسا زوراکی ئٹ بیگواہ کرینو۔
پانک ئنا رد ئٹ ہندی بندغ آتا پاننگ ءِ کہ چار انگا ورنا تے سوب ئنا سئے ءُ نیم بجہ غا ڈور ئنا خیر و دمبانی آن زوراکی ئٹ بیگواہ کننگانے۔ یاسر، سیف اللہ و شمس الرحمان مزور ءُ و شیہک خوانندہ ئسے۔ اوفتا بیگواہی آن پد اوفتا بابت ئٹ ہچو سرپندی تننگ متنے، اوفتا خاہوت آک تینا چُنا تیکن سخت پریشان ءُ۔
پانک ئنا رد ئٹ بلوچستان ئٹی زوراکی ئٹ بیگواہی تا لڑ ترندی ئٹ برجاء ءِ۔ بندغ آتے غیر قانودی ئٹ بیگواہ کننگ و خاہوت آتے حال وے تننگ بندغی حق آتا برخلافی ءِ۔
پانک سرکار آن خواست کرینے کہ یاسر، شمس الرحمان، سیف اللہ و شیہک ئے زوت آجو کننگ مرے و اوفتا خاہوت آتے پاننگ مرے، اوفتا آجوئی یخینی جوڑ کننگے۔ اگہ اوفتا ہمرو ہم دوبہ ئس ارے گُڑا عدالت ئٹی ہتنگ مریر اگہ نا گڑا یلہ کننگر۔
پانک جہانی بندغی حق آتا ادارہ و یو این آن خواست کرینے کہ دا تدینی تیا زوت پام ایتے و زیمی مروکا خاہوت آتے انصاف تننگ کن گامگیج ہرفے۔
