ڈنی ڈیہہ آن زوراکی ئٹ بیگواہ کننگوک کماش بلوچ راہشون استاد واحد کمبر نا آجوئی کن اونا خاہوت نا کنڈ آن اسہ ایکس مہم ئسے نا پڑو کننگانے۔
بلوچ وائس فار جسٹس دا بارو ئٹ چاگڑدی حوالکاری تلہ غا اسہ پوسٹ ئس کرسا پارینے کہ بلوچ راہشون استاد واحد کمبر نا رکھوک آجوئی کن اونا خاہوت نا کنڈ آن چاگڑدی حوالکاری تلہ ایکس آ اسہ مہم ئس چلفنگ مرو۔
او پاریر کہ نن کُل بندغ دوست و زند ئنا ہر فکری تپہ غا تعلقداری تخوکا تیان خواست کینہ کہ او دا مہم ئٹ بشخ ہلِسہ اونا رکھوک آجوئی کن توار ہرفر۔
مہم 20 ستمبر 2024 آ شام ئنا ہشت بجہ غان یانزدہ بجہ اسکام مرو و مخلوق آن خواس کننگانے کہ او دا مہم ئٹ بشخ ہلنگ کن ہیش ٹیک #ReleaseWahidKamberBaloch کاریم ئٹ ہتیر۔
یات مرے بلوچ کماش راہشون استاد واحد کمبر ئے 19 جولائی 2024 آ ایران نا شار کرمان آن زوراکی ئٹ بیگواہ کننگاسس۔
اونا خاہوت پریس کانفرنس کرسا پارینے کہ استاد واحد کمبر داکان مُست ہم پاکستانی لشکر نا دو آن زوراکی ئٹ بیگواہ و بیدادی تا گواچی کننگاسس۔ یلہ مننگ آن گڈ او روپوش مسس و کیہی ناجوڑی تا ہم گواچی اس ہرا نا سوب آن او ایران آ تینا علاج کن ہناسس ہراکان پاکستانی ایجنٹ آک اودے زوراکی ئٹ بیگواہ کرینو۔
او تینا پریس کانفرنس ئٹ ہم بندغی حق آتا کُل ادارہ و بلوچ راج آن خواست کریسر کہ او دا جہد ئٹ اوفتتون اوار مریر۔
