شنزدہ و لوڑو تیان دائسکان کیہی کسر تِہ دیر درینے ہراڑان بلوچستان نا کیہی جاگہ آتیا ہن ءَ بر بند مسنے۔
بلوچستان ٹی بشام نا پِھرک بیست جولائی آن دائسکان برجا ءُ۔ ہراڑے لوڑو و اُرا تا تمنگ آن دائسکان نوزدہ بندغ کھسکنے۔ ہندن چُنا تتون اوار یانزدہ بندغ ٹھپی ءُ۔ قلات، جھل مگسی، زیارت و صحبت پور نا علاقہ آک زیات زینمی مسنو۔
محکمہ مُد ئنا پاننگ ءِ کہ بلوچستان نا گیشتر ہند آک باسُن و نمب ءُ۔ کُتب دے ٹِکی بلوچستان ئٹی ارٹمیکو زوراک آ بشام نا پھرک برجاء ءُ ہرا نا سوَب آن بلوچستان ئٹی پین پِھر مننگ کیک۔
محکمہ مُد ژوب، بارکھان، موسیٰ خیل، شیرانی، لورالائی، سبی، زیارت، لسبیلہ، قلات، خضدار و نصیر آباد ئٹی اینو ہم پِھر ئنا گمان نا پارینے۔ پی ڈی ایم اے نا حساب آ ہنوکا بیست و چھار گھنٹہ ٹی قلات ئٹی چِھل و ہشت ملی میٹر، اوستہ محمد ئٹی بیست ءُ یک و شال ئٹی دہ ملی میٹر پِھر ریکارڈ کننگانے۔
پی ڈی ایم اے نا رد ئٹ بلوچستان ئٹی پِھر و لوڑو تیان بیست جولائی آن دائسکان پین مسہ جان ئنا نسخان مسنے۔ ہراڑان گُڈ داسکان لوڑو تیٹ و گروک آتا تمنگ آن چُنا تتون اوار نوزدہ بندغ بیران مسنو، نیاڑی تتون اوار یانزدہ بندغ ٹھپی مسنو۔
دا نیام ئٹی پِھر تیان چھار سد و سی و سئے اُرا تِہ نسخان رسینگانے، ہرافتیٹ یک سد و بیست و شش تیبہ ڈھرانو۔ پِھر تیان مُسہ ہزار سی و یک بندغ نا بےاُرا مننگ نا حوال ارے۔
پِھر تیان گیشتر جاگہ آتیٹ شش پُہل ئے نسخان مسنے ہندن گروک تمنگ ئٹی یک سد و سی و یک مال کھسکنے۔
بشام نا پِھرک نوَد و ہفت ایکڑ نا فصل آتے بھس کرینو، سی و یک کلو میٹر کسر و اسہ ہیلتھ یونٹ ئسے ہم بیست جولائی آن دائسکا نسخان رسینگانے۔ ہندن اِرا ہزار نُہہ سد و نوزدہ بندغ زوراک آ پِھر تیان زیمی مسنو۔ نوشکی و بیلہ ٹی لوڑو تیان بھاز آ خلق آتا ہِن ءَ بر سلیسنے و فصل آک نسخان مسنو۔
