مستونگ نا تحصیل کھڈ کوچہ ٹی ہنوکا 24 گھنٹہ آن برجاء انگا کرفیو نا سوب ان اُلس سخت جنجال آتیتون مون تننگ ءِ، دوا، خوراک و کُننگ نا دیر وے مننگ نا سوب آن ہڑدے ئی زند بھاز زیمی مسنے۔
یوسی چیئرمین میر عبداللطیف محمد حسنی نا پاننگ ءِ کہ کرفیو نا سوب آن شاریک سخت جنجال آتیتون مون تننگ ءُ، ہخس زو مرے اُلس ئے دا اذیت آن آجو کننگ مرے۔
داکان بیدس نواب محمد خان شاہوانی تینا بیان ئسیٹی محکمہ داخلہ نا نیمہ غان تحصیل کھڈ کوچہ ٹی وے چاننگ مروکا مُدت کن خلنگ مروکا کرفیو ئے بیدس جواز، اُلس دشمن و بنیاتی بندغی حق آتا برخلاف پارینے۔
او پارے کہ کھڈ کوچہ نا پُر ایمن انگا اُلس ئے اجتماعی سزا تننگ قابل قبول اف۔ کرفیو نا سوب آن ہڑدے ئی زند بھاز زیمی مسنے۔ علاقہ نا باغ و فصل آک تباہ مننگ ءُ، خوانندہ تا خواننگ، مریض آتا علاج، کاروبار و لس شاری تا ہن ءَ بر بھاز زیمی مسنے۔
او پارے کہ دُن انگا فیصلہ تا سوب آن اُلس ئٹی بے قراری و جنجال آک گیشتر مریرہ۔
