بلوچستان نا دریابی شار گوادر ئٹ بلوچ راجی مچی اِرا ہفتہ نا کچ برجاء سلنگ آن گڈ ایسر کننگا و داسا کاروان نا دروشم ئٹ تربت، پنجگور، گریشہ بسیمہ آن مرسا سوراب، قلات، مستونگ و منگچر آن گڈ نوشکی آ رادہ مسنے۔
بی وائے سی نا کاروان ہرا جاگہ غا تیان ہم گدرینگا اوڑے مخلوق نا بھلو کچ ئس اوفتا مونا پیشتمِسہ اوفتے بخیر کرے و مجلس آتیٹ اوار مسر۔ مجلس آتیٹ شہید آتے دروت ندر کننگا و راجی سوغند ہم ہرفنگ مس۔
بلوچ یکجہتی کمیٹی نا راہشون ڈاکٹر ماه رنگ بلوچ تون اوار سروک شاہ جی صبغت اللہ، فرزانہ رودینی، ماہ زیب بلوچ، ڈاکٹر واحد بلوچ و ایلو مجلس تیٹ تران کریر۔ اندن ڈاکٹر ماہ رنگ بلوچ مخلوق آن راجی سوغند ہلک۔
او پارے کہ بلوچ راج ءِ سُم تیٹ خُلیفنگ کننگ کپسہ، داسا وخت بسنے کہ بلوچ راج بش مرے انتئے کہ خاچوکا راج آتا بخت ئٹ ساندہ غلامی مریک، نن غلامی ئے منیپنہ۔
او پارے کہ بد بختی ئٹ بلوچ ئے خلوکا تیٹ ہم بلوچ اوار ءِ ہرا ڈیتھ اسکواڈ پاننگرہ و دا ڈیتھ اسکواڈ آتے بلوچستان نا کنڈ کنڈ آ یلہ کننگانے و دا شرم ئنا ہیت اسے کہ او تینا ایلم تے خلنگ ئٹ تُد ءُ۔
او پارے کہ دا تحریک ئے توننگ کن جتا چم بازی کاریم ئٹ ہتنگ مننگ ءِ ولے اوفتا دا چم بازی تیٹ دا تحریک سلوف۔
او پارے کہ شہید آتا قربانی تا سدخہ ئٹ دا تحریک داسا اسہ پوسکنو عزم و جوش ئسیٹ مُستی گھام خلنگ ءِ و داٹی ننے اسہ راج ئسے نا وڑ بشخ ہلوئی تمو۔
ریاستی زوراکی تیٹ تُد بندغ آتے پٹِسہ اوفتا سوشل بائیکاٹ و سرکاری سردار آتا برخلاف سلوئی تمو انتیے کہ دا راج ئنا زی آ مروکا ظلم و بدحالی ٹی اوفتا ہم دو ارے داسا اوفتا دو ئے ہم توروئی ءِ۔
