گریشہ خضدار آن بیگواہ مروک بندغاتا خاہوت آتا نیمہ آن مسٹمیکو دے ہم سی پیک کسر نال ٹوبڑو نا ہند آن بند کننگانے و برانز برجا اے۔
نمے سما اے کہ گریشہ خضدار آن سی ٹی ڈی نا دُو آن بیگواہ مروک بندغاتا خاہوت آک اِستو دھرنا آن پریس کانفرنس ئٹی تران کرسہ پاریر کہ نن ہنوکا سُہب آن سی پیک گری گریشہ و اینو ٹوبڑو نا ہند آ برانز کننگ اُن ، ولے انتظامیہ ننا ایف آئی آر ئے کنّنگ ئٹی اف۔
یات مرے کہ اینو یک شنبے آ گریشہ آن ریاستی فوج ئنا دُو آن بیگواہ مروکاتیکن نال بازار ئٹی ہڑتال اے۔
خاہوت آتا پاننگ اے کہ پھگہ اسکان ننا بندغاتہ یلہ کتّوس تو نن خضدار آن شال-کراچی بھلا کسر ئے بند کرون۔
او پریس کانفرنس ئٹی پاریر کہ جمعہ نا سُہب ئتو چھار بجہ آ وردی و سادہ ءُ پُچ بینوک سی ٹی ڈی نا کارندہ آک عبدالواحد/سلیم، خیر جان/محمد جان، عبدالرحمن/شاہ میر نا اُراتیٹ تھوفنک نا زور آ پیہار و لُٹ ءَ پُل کریر، اوڑتون اوار اُرانا گِڑاتہ ہم نسخان تسّہ۔
ہندن شاہ جان/سلیم، گور خان/خیر جان، عارف/عبدالرحمن، محمد جان/لال بخش، میار/لال بخش و منیر احمد/صبرو ئے ہلکُہ دریر، پدا منیر صبرو ئے کسر ئٹ یلہ کریر ولے ایلوفتہ دریر بیگواہ کریر، ہرافتا اینو اسکان ڈس اف۔
