تربت آن اسہ پین ورنا سے پاکستانی فوج ہلکنے و بیگواہ کرینے، ہندن شار ئٹی ہنوکا پانزدہ دے آن بیگواہ بندغاتا خاہوت آک دھرنا تننگ ئٹی ءُ۔
او تینا بندغاتا آجوئی کن پھگہ یک جولائی آ ہڑتال نا پارینُہ، ہرانا بلوچ یکجہتی کمیٹی حمایت نا پڑو کرینے ۔
زیارت بازار آپسر تربت آن ورنا محمد عارف باوہ نا پِن پیربخش ئے درے آن پاکستانی فوج ہلکنے و بیگواہ کرینے۔
خاہوت نا پاننگ کہ عارف اسہ مزورو بندغ ئسے ہرا گوادر اسٹاپ آ کاریم کیک۔
ایلو نیمہ آ بلیدہ زامران آن زور ئٹ بیگواہ تا خاہوت آک ہنوکا پانزدہ دے آن کیچ ڈپٹی کمشنر نا دفتر نا مون آ پنجا سینٹی گریڈ نا باسنی ٹی ہم برانز کننگ ئٹی ءُ۔
دا سخت آ وخت ئنا دھرنا ٹی نیاڑیک، خَدی آ چُناک پیرنگا لمہ و باوہ آک توسنُہ۔ او پھگہ یک جولائی آ زور ئٹ بیگواہی تا برخلاف ہڑتال نا پارینُہ۔
دا حوالہ ئٹ بلوچ یکجہتی کمیٹی نا جارکش تینا درشان ئٹی پارینے کہ یک جولائی آ بلیدہ زامران، کیچ آن زور ئٹ بیگواہ مروکا بندغاتا خاہوت آک ہڑتال نا پڑو کرینہ، اوفتون اوار سلوکُن۔
او پارے کہ بی وائی سی بلوچستان ٹی ریاستی ظلم و تادی آ افسوس کیک کہ زور ئٹ بیگواہیک و قانود نا برخلاف ہفّنگ دننگ نا تدینیک مننگ ئٹی ءُ
جارکش نا پاننگ کہ نن کیچ ئنا غُٹ کاروباری مخلوق و دُکان دار تا تنظیم آتان خواست کینہ کہ او دکان تہ بند کیر و دا ہڑتال ئے سرسوب کیر۔
