وائس فار بلوچ مسنگ پرسنز وی بی ایم پی نا سیکریٹری جنرل و زوراکی ئٹ بیگواہ مروکا ڈاکٹر دین محمد بلوچ نا مسڑ سمی دین بلوچ سوشل میڈیا پوسٹ ئسیٹی پارے کہ ای کُل سنگت و ہمراہ تہ اُست ئنا حُب ئٹ منتوار اُٹ ارا مُدام کنتون اوار سلیسُر و مُدام تینا نیک انگا خواہش آتے پاریر ۔ ای دا رد ئٹ تینے بھاز خوش قسمت پاوہ کہ کنتون کنا بندغ آک اوار ءُ ارا گام گام آ ہر مشکل حالیت ئٹی کنتون سلوک ءُ۔ او سنگت آتا ہم منتوار اُٹ ارا مُدام کنا حوصلہ افزائی کریسہ کرینو۔
او پارے کہ دا کسر ارزان اف ولے داخس بنگُنُٹ و خوانانُٹ کہ تہار انگا شام آن پد اَسہ روشنءُ سُہب ئس الم بریک و نن او وخت ئنا ودار ئٹ مرون اَسہ دُنو چاگڑد ئسے ٹی اراڑے بندغی حق آتے لتاڑنگ مف،کس ئنا کاٹم ظلم ئنا مون آ شیف مف۔ کس ئے بنیاتی بندغی حق آ تیکن جنگ کروئی مف، اَسہ ہندنو چاگڑد ئسینا اڈ کننگ ننا و نُم کُل ئنا ذمہ واری ءِ و دا ذمہ واری ئے نن جُہد کرسا دوئی کننگ کینہ۔
اَسہ وار ئس پدا نُم کُل ئنا منتوار اُٹ و امیت کیوہ بندغی حق آتا برخلافی پاکستان تون اوار جہان نا ہر کنڈا مننگءِ اوڑکن نن کُل توار بڑزا کین ۔
