بلوچستان ٹی پَنجگُور نا ہند وشبود نا اسکول ٹیچر نا خوانفنگ نا وخت سلاہ بند بندغ آتا دُو آن بیگواہی و اوکان پد اونا تشدد زدہ نت دُو تفوک جون ضلع واشک پلنتاک آن خننگا سیکنڈ ائیر نا خوانندہ ارسلان اسلام نا ایڑ سمیہ و اونا کزن فاطمہ تینا جاگہ آ خاہوت تون اوار پریس کانفرنس کریسہ پاریر کہ کنا ایلم راجی پدریج،اوفتا روشن انگا پھگ اکن بحیثیت ٹیچر جہد کار ئس اسکہ ۔
اوفتا پاننگ ئس کہ تینا ہند ٹی چُناتے ٹیوشن خوانیفکا او 14 مئی آ تینا سیکنڈ ایئر نا فزکس نا امتحان تس اُراغہ بس، ہردے نا وڑ او تینا اسکول پجار اکیڈمی ٹی چُناتے خوانفنگ کن ہنا،او اِرٹمی جماعت نا چُنا تے کلاس ٹی خوانفنگ اسکہ کہ نا دُرست سلاہ بند موٹر سئیکل آ تولوک بندغ آک اسکول ٹی پیہار و توفک نا زور آ ارسلان ئے برمتہ کریسہ تینتون دریر، نن دا حوالہ ئٹ پولیس ئے پارین و درخواست کرین ولے پولیس آختہ مننگ نا سوب آن تفتیش کننگ کتو۔
او پاریر کہ ننا کس اتون دشمنی افک و نہ ارسلان اسلام غیر قانونی کاریم تیٹی اوار مسُنے، اَسہ غریب ءُ خوانندہ ئس اسکہ ، کالج اسکول آن پد اُرا ٹی تینا وخت ئے گدریفیکا ۔
او پاریر کہ پَنجگُور ٹی بندغی ساہ ئے ہچ قدر و قیمت اف، نہ غریب نا توارئے یا دردئے محسوس کیرہ اگہ ہندُن اسکول آتیٹی پیہسہ ٹیچر آتے برمتہ و خلنگ مس گُڑا خوف پھگہ زیات مرو۔
