پنجگور چتکان بازار نا کسر تہ کاریم نا سلِنگ نا برخلاف دُکانک بند کنّنگار، دُکان تے بند کنّنگ نا پڑو ئے انجمن تاجران پنجگور کرینے۔ احوال آتا رِدٹ پنجگور شار نا کسر تہ کاریم نا سلِنگ نا برخلاف دکان تے بند کنّنگا۔ دکان بندی نا سوَب آن مُچ دُکانک، کاروباری جاگہ و بینک آک سرجم بند مسُر۔
دُکاندار کمیٹی نا پاننگءِ کہ شار ئنا کسرتے شش تُو مہالو کھٹفیر ولے داسکان اوفتا کاریم نا بِنا متنے ارانا لُوڑ ءُ دھنز آن دم ہلّنگ ہم مشکل مسّنے۔ دُکاندارتہ روزگار آ ہم اثر بسّنے۔
دُکاندارتا انجمن نا مُستی پاننگءِ کہ اے وخت اِسکان کسر تا کاریم نا بِنا کننگتنے ایسکا بازار بند رہینگو و نن مُستی تینا خْواست آتے منّفنگ کِن سی پیک روڈ آ دھرنا تِرون۔
دُکاندار تہ انجمن نا کماش فرید نواز مُستی پارے کہ دا معاملہ آ نن چیف سیکریٹری اِسکا ہم ہِناسُن ولے ہِچّس متو۔ بی اینڈ آر نا محکمہ دا معاملہ ئے پین مُرغن کرے۔
دا بارٹ ایکسئین روڈ پنجگور شہاب مگسی کسرتا کاریم نا سلِنگ نا سوَب پلانٹ لیبر نا بےافّی ئے پارے، او پائک کہ ہفتہ نا دے کسرتا کاریم نا بِنا کننگو۔
