بلوچ اسٹوڈنٹس آرگنائزیشن نا جارکش تینا شنگ کروکا درشان ئٹی پارینے کہ بلوچستان ئٹی بلوچ راج ئنا اُست ئٹ تینکن نفرت و آجوئی نا فکر نا تالانی ئے خنسہ کوزہ گیر آمخ مسّنے۔ و ہر چم ئٹ بلوچ جہد ئے نزور کننگ کِن نَت ءَ دُو خلیک ولے بےسوبءِ۔ ہِنوکا بیست سال آن ریاست نا بلوچستان ئٹی بےسوبی ئے خنسہ کوزہ گیر اسلام آباد ئے دا سرپند مروئی ءِ کہ بلوچ راج راجی آجوئی نا فلسفہ آ سلوک ءِ و او دشمن نا ہِچّو چم ئسیٹ بفک۔ ریاست تینے گچین کننگ نا دروغ ئے سرفراز بگٹی آن تھڑفک ولے ہندا بندغ تینٹ دُزی، دروغ و چم بازی ئٹ داڑے ہتفوکے، اونا جند ئے بلوچستان ٹی حیثیت اف۔
او پارے کہ گِڑاس سرکاری ڈیتھ اسکواڈ نا کارندہ تے سیاست نا پِن آ بےمراد ءُ پارلیمنٹ ئسیٹ مُچ کننگانے، ہراکا حکومت ئے گچین کننگ نا دروغ آک شنگ مریرہ و دا پھاش کننگک کہ بلوچستان نا بھلا ویل کرپشن ءِ، حکومت نا نزوری تے ہلّیسہ مسئلہ آتے چُھٹّفنگ مریک، ولے راستی دادے کہ دا غُٹ بندغاک فوج ئنا چم بازی ئٹ ہتنگوکو۔ ہَرا تینٹ دروغ و بَیمانی ئٹ بروکے او دافتے اراکا چُھٹّفرہ۔ بھلے بلوچستان نا مسئلہ وختس ہم حکومت نا گچینی و خرابی رہینگتنے بلکہ بنیاتی مسئلہ بلوچستان آ پاکستان نا کوزہ اے ہَرادے او زور ئنا زیہا سوگو کننگ خْواہک۔
او پارے کہ بلوچستان ئٹی راجی جہد ئنا تالانی ئے خنسہ بےسوب ءُ چم بازی تا بِنا کننگانے ہَرادے فوج حکومت نا کارندہ آتا باٹی شاغنگ ئٹی اے کہ حکومت ئے سوگو کروئی اے ولے فوج تینٹ بلوچستان ٹی کوزہ گیر نا دْروشم ئٹ بسّنے۔ داسا فوج تینا بےسوبی ئے خنسہ مخلوق نا است ئٹی تینا نفرت ئے دا وڑ ئنا چم آتیٹ کم کننگ خْواہک کہ دا ڈؤل ئٹ بلوچستان ٹی لُٹ و پُل و کوزہ گیری ئے سوگو کننگے۔ داکا مہالو ہم بلوچستان نا حق آتا پِن آ پیکج نا پارسہ ایلو نیمہ آ بلوچ آتا خلّنگ نا بِنا کننگا۔ دا وڑ نا کاریم تا مکست فوج ئنا زوراکی تیک کسر جوڑ کننگے۔
جارکش پارے کہ کوزہ تینٹ غیرقانونی و غیرفطری ءُ گام ئسے دانا بنیاتی مکست ہم دُزّی و لُٹ و پُل تون تفوکے، دا امر مننگ کیک کہ بلوچستان ٹی پاکستان نا کوزہ گیری ٹی حکومت ئے شَر کننگے، دا مُچ ہیتاک ہندا سوَب آن کننگرہ کہ بلوچستان ٹی برجا آ فوج کشی و ہفّنگ خلّنگ ئے مخلوق گیرام کے۔ بلوچستان ٹی دا وخت کوزہ گیر طاقت آک بھازا پیشن نا سرمایہ دارانہ کمپنی تون اوار بلوچ نا خزانہ آتے لُٹّرہ ہندن ایلو کُنڈا بلوچ ئے خلّنگ کِن مُچ بلوچستان ٹی فوج کشی کننگانے۔ دا کُل جُرم آتے ڈھکنگ کِن بلوچستان ٹی حکومت ئے گچین کننگ نا ہیت کننگک ولے کوزہ گیر، فوج ئنا زور آن بلوچستان ٹی ساڑی ءِ۔
