زوراکی ئٹ بیگواہ مروکا ممتاز بلوچ نا ایڑ ئنا چُنا بانڑی پارے کہ کنا ماما ممتاز بلوچ ئے 6ستمبر 2022 آ خضدار آن مُسٹمکیو وار زوراکی ئٹ بیگواہ کننگا ، کنا ماما دائسکان بیگواہ ءِ ۔
او پارے کہ ممتاز نا لُمہ ، کنا بلا ممتاز نا ودار ئٹ بھاز بیمار ءِ ، او تینا مار اتون ملنگ خوائک ، بانڑی بلوچ سوشل میڈیا باسک،حوالکار و بندغی حق آتا ذمہ وار آ تیان خواست کرے کہ او ننتون مہم ئٹ اوار مریر و کنا ماما نا رکھ آجوئی کن توار بڑز کیر ۔
او پارے کہ نن ممتاز بلوچ نا رکھ آجوئی کن 4 مارچ 2024 آ بلوچ وائس فار جسٹس تون اوار مرسہ شام ئنا 7 بج آن 12 بج اسکان ایکس آ مہم ئس اڈ تننگءُ ، ای کل آن خواست کیوہ کہ دا مہم ئٹ بشخ ہلیسہ دا ہیش ٹیگReleaseMumtazBaloch# ئے کارمرز کیر ۔
یاتی مرے کہ ممتاز بلوچ مشکے نا ہندی سے اودے داکان مُست اولیکو وار 2016 ٹی زوراکی ئٹ بیگواہ کریر اوکان پد ہفت تُوو ئنا بیگواہی آن پد یلا مس پدا 2017 ٹی برمتہ کننگا و جنوری 2020 ئٹی آجو مس و داسا 6ستمبر 2022 آ مسٹمیکو وار اودے خضدار آن زوراکی ئٹ بیگواہ کننگا کہ دائسکان اونا ہچو حوال ئس اف او اراڑے کے ، انت حال ئٹیءِ ؟ اونا خاوت ہنوکا اِرٹ ءُ نیم سال آن ودار ئٹیءِ، اونا لمہ بھاز بیمار ءِ ، ممتاز بلوچ نا خاوت بندغی حق آتا تنظیم آ تیان اونا رکھ آجوئی کن کردار ادا کننگ نا خواست کرینے۔
