ضلع خضدار نا علاقہ بلبل زہری ٹی سئے شمبے نا دے پاکستانی فوج اسہ بھلو آپریشن ئسینا وخت سیاسی رہشون و یونین کونسل نا گچین مروکا باسک میر خلیل احمد موسیانی خلنگانے و کیہی بندغ آتے دزگیر کننگ نا حوال ارے۔
یات مرے کہ درو سہب ئنا وخت پاکستانی فوج ہیلی کاپٹر و بکتر بند لاری تیتون بلبل زہری آ جلہو کرے۔ علاقہ ٹی سُمکاری و کاروائیک کیہی گھنٹہ اسکان برجاء مسُر۔ کاروائی نا وخت موسیانی قبیلہ نا سربر و مسکوہی ضلعی ناظم خضدار سردار نصیر احمد موسیانی نا اُراغا چھاپہ خلک، ہراڑے خلیل احمد آ سُمکاری کننگا۔ خاہوت نا پاننگ ءِ کہ اودے ٹپی حالیت ئٹی تینتون دریر پدا اونا کہنگ نا حوال تننگا۔
بی این پی ضلع خضدار نا علاقہ بلبل زہری ٹی تینا ہندی رہشون نا کوش و اونا جون ئے خاہوت نا حوالہ وے کننگ نا سخت لوز آتیٹی مذمت ئے کرینے۔ بیان ئٹی مُستی پارینو کہ کاروائی نا وخت بی این پی نا سنٹرل ایگزیکٹو کمیٹی نا باسک و مُسکوہی ضلعی ناظم خضدار نصیر احمد موسیانی آئے لٹ ئہ کٹ کرینو و اونا خاہوت و خُڑک ئنا سیال آتون اوار کیہی بندغ آتے دزگیر کرینو۔
بی این پی نا رد ئٹ کاروائی نا وخت بلبل کراس نا اسہ اسکول ئسے دزگیر کننگوک آتا مرکز و کیمپ کرینو۔ اوفتا رد ئٹ علاقہ ٹی کرفیو ءِ و ہندی بندغ آتے ہن و بر کن مشکل مننگ ءِ۔
بی این پی خواست کرینے کہ میر خیل احمد موسیانی نا میت ئے زوت خاہوت نا حوالہ کننگ مرے و کُل دزگیر کننگوک آتے زوت آجو کیر و اوفتے قانون نا رد ئٹ عدالت ئٹی ہتنگ مرے و تدینی نا پٹ و پول کننگ مرے۔
