بلوچ لبریشن آرمی نا جارکش جیئند بلوچ میڈیا ٹی شنگ کروکو درشان ئسیٹی پارے کہ آپریشن درہِ بولان 29 جنوری تہ 31 جنوری، اِرا دے سرسہبی ئٹ تینا ہدف آتے پورو کرسہ ایسر مس۔ آپریشن درہِ بولان ئٹی بی ایل اے نا چار جتا اِنگا یونٹ آتا 385 سرمچاراک بشخ ہلکُر۔ بی ایل اے مجید برگیڈ نا 12 فدائی اوار اسُر۔ ایلو یونٹ فتح اسکواڈ، اسپیشل ٹیکٹیکل آپریشنز اسکواڈ (ایس ٹی او ایس) و انٹیلیجنس ونگ اوار اسُر۔
آپریشن درہِ بولان نا بِناء 29 جنوری 2024 نا شام ہندی وخت 9 بجہ آ مس، ارا 2 دے اسکان دا آپریشن برجاء مس و تینا ہدف آتے پورو کننگ آن پد بی ایل اے نا سینئر کمانڈ کونسل 31 جنوری 2024 نا شام ئنا 7 بجہ آ آپریشن درہِ بولان نا ایسری نا پڑو کرے، کُل یونٹ آک پدا تینا بیس کیمپ آتے رپورٹ کریر۔ دا آپریشن ٹی بی ایل اے نا سرمچاراک مچھ نا شہر تون اوار 70 کلومیٹر ناریڈیس نا ہند ئے تینا کنٹرول ئٹی کریسُر۔ ہراٹی این ایچ 65 نا بھلا کسر ہم اوار ئس۔
آپریشن درہِ بولان ئٹی دشمن نا 78 کارندہ آک خلنگار، 45 ایف سی کارمندہ آک مچھ شہری ئٹی آپریشن نا اولی مُسِہ گھنٹہ تیٹی خلنگار۔ 10 ایف سی کارندہ آک پیرغیب بولان ئٹی لشکر نا کمیپ آ جلہو ئٹی خلنگار، 4 ایف سی کارندہ آک لشکر نا قافلہ گوکرت مچھ جلہو ئٹی خلنگار، 12 ریگولر آرمی کارندہ آتے 30 جنوری آ مجید برگیڈ نا فدائیک خلیسہ ایف سی ہیڈ کوارٹر ئٹی پیہار، 5 ایس ایس جی کمانڈو 31 جنوری آ فدائیک خلکُر، اِرا پولیس کارمندہ ہم خلنگا، اوفتیٹی ایس ایچ او ئس اوار ئس۔ بی ایل اے بھلو کچ ئسیٹی لیویز و پولیس کارندہ آتے دزگیر کرے، ولے بلوچ مننگ نا بنیات آ اوفتے یلہ کننگا ولے ایس ایچ او ننا رعایت نا ناجائزہ فائدہ ہرفنگ نا کوشست ئے کرے و اودے خلکُر۔
آپریشن درہِ بولان ٹی بلوچ لبریشن آرمی نا 13 سرمچار آک شہید مسُر۔ شھید مروکاتیٹی 12 سرمچار مجید برگیڈ نا فدائیک اسُر و اسِہ سرمچار ئس بی ایل اے فتح اسکواڈ نا سرمچار ئس ئس۔کُل فدائینک شہادت نا فیصلہ کرسا بس اسُر، ہرافک ایف سی ہیڈ کوارٹر نا نیام ئٹی سر مننگ آ سُہبمند مسُر و اِرا دے اسکان دشمن نا نیام ئٹی رہینگیسہ اودے بے سُہب کریر۔ سرزمین نا عظیم اِنگا چُنا تہ تیوعہ حوال آتے زوت میڈیا ٹی شنگ کننگ مرو۔ اِرا دے اسکان تیوعہ ہندئے تینا کنٹرول ئٹی کننگ آن پد دشمن لشکر فدائین تہ ابید اسہ سرمچار ئس شہید کرے۔ ہرا بی ایل اے نا پیشہ ورانہ صلاحیت آتا ثبوتءِ۔
بلوچ لبریشن آرمی ئے آپریشن درہ بولان نا وخت بلوچ راجی آجوئی سنگر(براس) ئنا اتحادی تنظیم آتا تیوعہ مدد و تعاون تُد مسُنے۔ ہرا بلوچ راجی اتحاد و اتفاق نا تاریخ ئٹی چیدہ سینا حیثیت ئے تخک۔
آپریشن درہ بولان نا اِرا حدف اسُر۔ اولی بلوچ راج ئے دا نشان تننگ کہ اوفتا راجی لشکر بی ایل اے ئے دا صلاحیت ارے کہ قوضہ گیر دشمن پاکستان آن نا قوضہ آن اسہ پورو شہر ئسے ہلیسہ اِرا دے اسکان تینا کنٹرول ئٹی کننگ کیک۔ نن تینا راج ئے دا پیغام تننگ خوائنا کہ اینو قوضہ گیر پاکستانی لشکر تینا ظلم و جبر ئنا بازارئے گرم کرینے ہراڑان رکھنگ نا کسر بلوچ راجی فوج ئسینا مننگءِ ہرا نُما رکھ ئے پیشن آن بروکا جلہوکار آتیان کننگ کے۔ بلوچ لبریشن آرمی ،بلوچ راج ئنا تینا قانونی فوجءِ ہرانا راہا تیوعہ اختیار ارے کہ او تینا راجی آجوئی کن جنگ کے و اودے رکھیفے۔
بی ایل اے تینا راج ئے دا پیغام ئے تننگ خوائک کہ او بلوچ راجی لشکر بی ایل اے ئے گیش محکم کیر،ننا کُمک جوڑ مریر۔ بلوچ راج عملی رد ئٹ ننا صف تیٹی اوار مرسا دشمن ئے تینا سرزمین آن نرنگ کن مجبور کیر، اگہ اوفتا جند آک دا جنگ ئنا بشخ مننگ کپسہ گُڑا تینا راجی لشکر نا سیاسی،معاشی و سفارتی کمک ئے کیر یا کم از کم بی ایل اے نا توار جوڑ مریر و ننا پیغام ئے اُرا اُراغہ سر کیر۔ ہرا بلوچ اخسءُ بشخ ئس شاغنگ کیک او تینا بشخ ئے شاغر ولے بے توار مفس۔
دا بد تہذیب دشمن ئے نن دا پیغام ئے تننگ خوائنا کہ نن کُل گڑاتے ہُننگ اُن نی امر ننا بلوچ لُمہ،ایڑ تیتون اسلام آباد نا کسرتہ انت کتوس۔ دا نا ناپوہی مرو کہ نی بلوچ راج ئنا زالبول آتیتون ہمو وڑ کروس ہرا وڑ نی بنگالی تہ لکھ آتا کچ ئٹ زالبول آتیتون کریس۔ دا بلوچ لُمہ،ایڑ تہ بی ایل اے تون اوار بلوچ راج رکھیفوکءِ و تینا راج ئنا رکھیفنگ ،ننگ و ناموس نا رکھیفنگ کن بی ایل اے سختءُ گامگیج ہرفنگ کن تیارءِ۔
آپریشن درہ بولان نا ایلو مسخت،جہانی آتیان تینا توارئے سر کننگ ئس۔ جہانی طاقت آتے دا نشان تننگ ئس کہ اگہ بلوچ کس ئسینا کُمک آن بیدس تینا طاقت تون دُنو بھلو آپریشن کننگ کیک اگہ ننے کُمک تُد مرے نن دا قوضہ گیر دشمن نا انت حشر کرون و قوضہ گیر لشکرئے زوت تینا سرزمین آن کشنگ کن مجبور کرون۔ دا آپریشن نا ذریعہ ئٹ نن جہان و ہمو ادارہ آتا سر مننگ خوائنا ہرافتا فائدہ آک بلوچ راج اتون تفوک ءُ۔ نن اوفتے پیغام تننگ خوائنا کہ اسہ دشمن نا برخلاف،اواری نا فائدہ آتا رد ئٹ بی ایل اے کس ئسیتون ہم اواری کن تیارءِ۔
