بلوچ نیشنل موومنٹ نا بندغی حق آتا ادارہ پانک خضدار نا ہند نال ئنا ہندی الہی بخش ولد رسول بخش نا چار دے ئنا بیگواہی آن پد سم ئٹ خلوکا جون ئنا دو تمنگ نا سخت انگا لوز آتیئٹ مذمت ئے کرسہ پارینے کہ او اسہ مستری ئسے، اودے پاکستانی لشکر و ڈھکوک ادارہ غاک نال ئنا بازار آن دزگیر کننگ آن پد بیگواہ کرینو۔ چار دے آن پد 03 نومبر 2026 آ اونا سم ئٹ خلوکا جون نال ئنا خڑک ئنا خلق استکلی آن دو تمانے۔
او مستی پارینے کہ الہی بخش نا کوش بلوچستان ئٹ زوراکی ئٹ بیگواہی آن پد جون تا دوئی مننگ نا ویل آتے اسٹ گیشتر کرینے، دا وڑ انگا ویل آک بندغی حق و زندگی نا بنداوی حق آتا لتاڑ ءِ۔
پانک اقوام متحدہ و جہانی ادارہ تیان خواست کرینے کہ بلوچستان ئٹی برجاء انگا زوراکی ئٹ بیگواہی و وے قانودی ئٹ کوش آتا ویل آتیا پام ایتر و دا ویل آتے توننگ کن تینا کڑدار ئے ادا کیر۔
