کراچی: پاکستانی فوج ئنا دو آن زوراکی ئٹ بیگواہ کننگوک آ داد شاہ بلوچ نا ایڑ و بی وائی سی نا باسک فوزیہ بلوچ تینا شنگ کروک بیان ئسیٹی پارے کہ کنا ایلم نا زوراکی ئٹ بیگواہی ءِ شش تو و دہ دے پورو مسُنے ولے داسکان اونا بابت ئٹ ننے ہچو حوال ئس اف۔ ننے دا ہم پاننگ افس کہ او ارانگ ءِ، نہ اودے عدالت نا مونا ہتنگ ءُ نہ اونا دزگیری نا ہیت ءِ مونا ہتنگ مسُنے۔
اونا پاننگ ءِ کہ سی ٹی ڈی نا کارندہ غاک کنا ایلم ءِ ننا مونا دزگیر کرسا درینو ولے پدا ہم ننے اونا سلامتی نا حوال اف۔ دا شش تو تنیا اسہ وخت ئس اف بلکن اسہ لُمہ ئس ہڑدے تینا چُنا کن ودار کرینے و ہندا اُمیت آ توسُنے بلکن کنا چُنا برے۔ اینو ہم ہندا لمہ تینا چُنا کن ہرُوک ءِ و ہندا فریشانی اودے کُننگ ءِ کہ او امر ءِ و ارانگ ءِ، داکان بھلو اذیت اسہ لُمہ ئسیکن انت مرو؟
اونا پاننگ ءِ کہ قانود نا وردی و ادارہ نا پن قانود آن بھلُن اف۔ ادارہ آک بائدہ قانود نا رد ئٹ کاریم کیر تینا منشاء ءِ کارمرز کپس۔ اگہ کنا ایلم آ دوبہ ئس ارے گُڑا اودے عدالت نا مونا ہتنگ مرے ۔ شش تو اسکان اسہ خاہوت ئسے اونا چنا نا بابت ئٹ سرپندی وے تننگ انصاف ئس اف۔
فوزیہ بلوچ میڈیا، سیاسی و چاگڑدی باسک، وکیل، بندغی حق آتا باسک، سول سوسائٹی و بندغی حق آتا ادارہ تیان خواست کرینے کہ کنا ایلم داد شاہ بلوچ نا آجوئی کن توار بُڑز کیر۔
