زوراکی ئٹ بیگواہ کننگوک آ غلام حیدر نا خاہوت وی بی ایم پی نا گدان آ پریس کانفرنس کرسا پارے کہ غلام حیدر کُرد ولد جمعہ خان ءِ 12 مارچ 2026 آ کوئٹہ نا علاقہ مشرقی بائی پاس، گلی نمبر 19، کلی پرکانی نا خُڑک آن سی ٹی ڈی و ایلو ادارہ تا کارندہ آک دزگیر کرسا بیگواہ کرینو۔
خاہوت نا رد ئٹ اوفتے اینو اسکان غلام حیدر نا بابت ئٹ ہچو ڈس ئس تننگ افس۔ اونا لُمہ، ایڑ، ایلم و ایلو خاہوت سخت پریشانی، اذیت و بے یخینی نا گواچیءُ۔ اسہ لُمہ و خاہوت کن دا حالیت سخت تکلیف نا سوبءِ ہرافتا تینا چُنا نا جاگہ و سلامتی نا بابت ئٹ ہچو ڈس اف۔
خاہوت کالخواہ تیان خواست کرینے کہ اوفک غلام حیدر کُردءِ زوت آجو کیر۔ اگہ اوڑا دوبہ ئس ارے گُڑا عدالت ئٹی ہتیسا قانود نا رد ئٹ دوبہ تا پاننگ کرے و اودے تینا صفائی و قانودی رکھ ئنا تیبا حق تننگ مرے۔
خاہوت حوالکار تیان ہم خواست کرینے کہ اوفک غلام حیدر کرد نا خاہوت نا توار مریر و اونا آجوئی کن ننا فریادءِ کالخواہ تے سر کننگ کن تینا کڑدارءِ ادا کیر۔
