بلوچستان نا جتا جتا غا ہند تیان پنچ بندغ نا زوراکی ئٹ بیگواہ کننگ نا حوال مونا بسُنے ، اندن مستونگ آن زوراکی ئٹ بیگواہ کننگوک اسہ زالبول ئس آجو مرسہ کوئٹہ ءِ سر مسُنے ۔
حوال تا رِد ئٹ حافظ شاہ میر ولد نواب پَنجگُور عیسیٰ نا جہی ءِ استو پاکستانی لشکر دزگیر کرسہ زوراکی ئٹ بیگواہ کرینے ۔
کوئٹہ نا ہند کلی جیو آن 20 فروری 2026 آ سیزدہ سالہ خوانندہ امان اللہ بنگلزئی ولد عنایت اللہ بنگلزئی ءِ نن ئنا دو بجھ آ اُراغان سی ٹی ڈی نا کارندہ غاک دزگیر کرسہ بیگواہ کرینو ۔
تُربَت نا ہند ملائی بازار آن 19 اگست 2026 آ بیست سالہ خوانندہ فہد انور ولد انور ءِ نن ئنا یک بجہ آ اُراغان ایم آئی و ایف سی نا کارندہ غاک دزگیر کرسہ بیگواہ کرینو ۔
اندن ضلع کیچ ئنا ہند بلیدہ نا جہی بیست چار سالہ چنگیز ولد محمد ابراہیم ءِ 4 ستمبر 2026 آ نن ئنا یانزدہ بجہ آ تربت نا ہند آپسر آن ایف سی نا کارندہ غاک دزگیر کرسہ بیگواہ کریر ۔
مستونگ نا جہی احسان بلوچ ولد محمد اسماعیل ءِ 9 ستمبر 2026 آ سعب ئنا نو بجھ لک پاس چیک پوسٹ مستونگ آن ایم آئی و ایف سی نا کارندہ غاک دزگیر کرسہ بیگواہ کرینو ۔
ایلو نیمہ غا مستونگ نا علاقہ کردگاپ آن پاکستانی لشکر نا دُو آن 11 ستمبر 2026 آ زوراکی ئٹ بیگواہ کننگوک سیما بلوچ بنت ماسٹر عبدالستار 17 ستمبر آ آجو مرسہ کوئٹہ ءِ سر مسُنے ۔
