بلوچستان نا ضلع خضدار نا علاقہ زہری و کوئٹہ نا ہند شعبان ئٹی پاکستانی فوج ئنا جلہو، جیٹ آتا بمباری و سخت فوجی زوراکی تا لڑ برجاءءِ، ہرانا سوب آن اسہ زالبول ئس خلنگانے و کیہی ٹپی مسونے، کیہی بندغ آتے زوراکی ئٹ بیگواہ کننگانے۔
تحصیل زہری نا علاقہ سنی و ایب کھیب ئٹ ہنوکا کیہی توو آن کرفیوئے پین تروند کننگانے۔ حوال تا رد ئٹ فوج ئنا کواڈ کاپٹر ڈرون جلہو ئٹی دیر دروکا زالبول ئس خلنگانے و پین زالبول ئسیتون اوار اِرا بندغ سخت ٹپی مسونے۔
لشکر کشی نا وخت فوج زہری سنی آن 25 ہندی بندغ آتے دزگیر کرسا نادُرست جاگہ آتا درینے، علاقہ ٹی موبائل نیٹ ورک و رابطہ نا نظام مفننگ نا سوب آن بیگواہ کروکا بندغ آتا چاہنداری مننگ کتنے۔
یات مرے کہ زہری ٹی سخت پابندیک نافذءُ ہراڑے شاری تا اُراغان پیش تمنگ و بازار آ ہننگ کن مخصوص وخت مقرر کرینو، علاقہ آن پیش تمنگ کن فوج ئنا اجازت المیءِ۔
داکان مُست زہری نا ہند سوہندہ ٹی ہم پاکستانی فوج ئنا آپریشن ئٹی 20 آن گیش عام بندغ خلنگاسس و کیہی شاری تے زوراکی ئٹ بیگواہ کرینو۔
ایلو نیمہ غا کوئٹہ نا ہند شعبان نا مش تیٹی استو پاکستانی فوج ئنا جیٹ آک سخت بمباری کرینو۔ دا ارا دے تیٹی بمباری نا ارٹمی تدینیءِ۔
داکان مُست قلات نا علاقہ گوران ئٹی ہم جیٹ آک بمباری کریسُر ہراکان ہندی بندغ آتا کیہی اُراک بھُس مس اسُر و ہنوکا توو سوراب گدر و گوندان ئٹی فوج ئنا بمباری ٹی 27 بندغ خلنگ مسس خلنگ مروکا تیٹی گیشتر چُنا و زالبول اسُر۔
