تربت ٹیچنگ اسپتال ئٹی ڈاکٹر آک ، پیرا میڈیکل اسٹاف و ایلو طبی عملہ نا پارہ غان برانز ئتون اوار طبی خزمت آتان بائیکاٹ برجاء ئے۔
حوال آتا ردئٹ اسلام آباد تون اوار پاکستان نا ایلو جتائنگا شار آتان صحافی و یوٹیوبر آتا تربت آ بننگ نا موقع غا پاکستانی فورسز نا اسپتال نا ہنوک و بروک کسر تیا رکھ خلکونے ۔ ہندا وخت آ ڈاکٹر آتا و پیرامیڈیکل اسٹاف و ایلو طبی عملہ تا اسپتال ئٹی پیہنگ آ رکھ خلنگانے۔
اسپتال حوالکار آتا ردئٹ ایف سی کارندہ غاک بھاز سینئر ڈاکٹر آتے آ بےدادی و لٹ و کٹ و بےدادی والا رویہ اختیار کرینو ۔ حوال آتا ردئٹ منہ ڈاکٹر آ توفک توریسہ تڑی ہم تننگانے۔
ہندا تدینی تیان پد پیرامیڈیکل اسٹاف و پیرامیڈیکل ایسوسی ایشن نا پارہ غان اسپتال نا احاطہ ٹی برانزی ریلی کشنگانے، ہراڑے پاکستانی فورسز نا کارندہ غاتا رویہ نا برخلاف نعرہ بازی کننگانے۔
